UZODLULISELWA kuSomlomo wePhalamende, uNkk Nosiviwe Mapisa-Nqakula, umbiko wophenyo othinta inyuvesi i-Unisa njengoba ususezandleni zomkhandlu olawula le nyuvesi.
Lolu phenyo lwajutshwa nguNgqongqoshe weMfundo ePhakeme, uDkt Blade Nzimande, okumanje umatasa nawo ngaphambi kokuba awushicilele emqulwini kahulumeni, i-Government Gazette.
UNzimande uthe uzokhipha umkhombandlela uma esephothule ukuwufunda umbiko elandela imithetho ebekiwe.
Uthe izincomo zawo yizona ezizomnika umhlahlandlela ngokumele akwenze.
UNzimande waqoka uSolwazi Themba Mosia ukuthi aphenye izinkinga kule nyuvesi.
UNzimande ubonge zonke izinhlaka ezehlukene kule nyuvesi ezisize uMosia ngesikhathi enza uphenyo.
“Sibonga ngokubambisana ekutheni kusheshe kuphothulwe uphenyo.”
UMosia uqokwe nyakenye ukuthi aphenye ngezinkinga kulesi sikhungo okubalwa nezinhlaka zokuphatha, imigomo elawula le nyuvesi, ukuthengwa kwempahla nezinsiza kanjalo nezinsolo zokusebenzisa budedengu imali.
Le nyuvesi ike yaba neziteleka zabasebenzi nyakenye ngesikhathi kuphazamiseka nokuthweswa kwezitshudeni imiyezane.
Kwaphazamiseka nokusebenza kwale nyuvesi kwacekelwa phansi nempahla yesikhungo.
Abasebenzi babengeneme ngendlela umphathi alawula ngayo inyuvesi uSolwazi Puleng LenkaBula.