INTSHA yaKwaHlabisa isizokuzwa ngendaba ukuntuleka kwemisebenzi njengoba uMasipala weBig 5 Hlabisa uzokwakha inxanxathela yezitolo.
Babalelwa ku-500 abantu abasha abangasebenzi abasenhlanhleni yokuqashwa uma sekwakhiwe inxanxathela yezitolo edolobheni laseHluhluwe.
Lokhu kuvezwe imeya yalo mkhandlu uMnuz Comfort Khumalo emcimbini obukwaMnqobokazi KwaHlabisa ngesikhathi yethula isabelo zimali nezinhlelo zamaprojekthi amasha, okuhloswe ngawo ukuthuthukisa umphakathi.
"Umhlaba okuzokwakhiwa kuwo inxanxathela yezitolo usukhona. Yize umasipala usenezingxoxo nosozimali ngokuba yingxenye yalolu hlelo, ukhona usomabhizinisi oyedwa esingadalula ukuthi izingxoxo eziphakathi komkhandlu naye sezikuvuthondaba," kusho uKhumalo.
Eqhuba unxenxe osomabhizinisi neminyango kahulumeni ekweleta ama-rates kumasipala ngokuthi ikhokhe isikweletu ukuze bakwazi ukuqhuba izinhlelo zentuthuko yomphakathi.