UMSAKAZI woKhozi FM, uSiphiwe Sibiya, uthembisa lukhulu emcimbini onedumela iDoek Nation Picnic eMayors Garden eMgungundlovu, ngoMgqibelo, kusukela ngo-10 ekuseni.
Kulo mcimbi uSiphiwe (34) uzobe eshiyelana inkundla nezihlabani okubalwa kuzo uLady Du, Nomfundo Moh, Nontokozo Mkhize, Ash-ley Ogle, Lucy Lu noLetaken kanti uhlelo luzobe luphethwe wuSlay Vee noBlacksash.
USiphiwe uthe uzobe eklwebha amapuleti ngoba ubuye asebenze njengoDJ womculo opholile.
"Into engiyithembisayo umculo omnandi we-soul nowe-RnB, enginesiqiniseko sokuthi uzothakaselwa ngabantu abaningi."
Uthe uzoqhulula izingoma ezizokwenza izihlwele zize zingawukhohlwa lo mcimbi ngoba uzobe edidiyela amanoni angasoze abuna.
"Ngangingazi ukuthi into yami yokuba uDJ we-soul ne-RnB iyokhula kangaka. Ngiyakhumbula ngiqala ukuba uDJ ngaphambi kokuqala kweCOVID-19. Ngaphoqeleka ukuthi ngime kancane ngenxa yokuvalwa kwezwe. Ngaphinde ngabuyela ngokuhamba kwesikhathi ngokusizwa oDJ engisebenze nabo kulo mkhakha."
USiphiwe uthe kwamsiza ukungalaleli ababethi akagxile emculweni we-house ngoba manje ngomculo opholile usebuya konandisa ezindaweni eziningi okubalwa kuzo oDrakensberg, Mnambithi nasemicimbini yeminyango kahulumeni nakomasipala.
"Ngathi nje cha, mina ngifuna ukuhluka, ngizodlala umculo omnandi we-soul neRnB futhi opholile okukhumbuza e-Never never."
Kwenzeka lokhu nje, uSiphiwe usanda kunikezwa uhlelo lwakhe olusha oKhozini ngamaSonto, phakathi kuka-3 no-6 ekuseni, Icebo Lakhe.
"Ngangingazi ukuthi imithandazo yami yeminyaka eyishumi iyophenduleka. Ngiyazithoba okwangempela ngakho konke."
Le ntokazi, eyadla umhlanganiso kwiWinnie Mahlangu Next Female Presenter Search nyakenye, igabe ngekhono, ulwazi nekhono kule ndima yezokusakaza.
USiphiwe waKwaMachibisa, eMgungundlovu, wafunda eSigodini Primary ngaphambi kokuphothula u-matric e-Edendale ComTech High.
Yize efunde wagogoda ezifundweni ze-Electrical Engineering eVaal University of Technology, kodwa ngenxa yobizo lokusakaza, uSiphiwe ugcine eseyofundela ukusakaza.
"Ngafunda eCreative Art College, ngenza izifundo zeJournalism and Media Studies neRadio Production."
USiphiwe uqale wasebenza njengophrojusa esiteshini somphakathi waseMgungundlovu, i-104KZN Capital FM ngo-2013 ngaphambi kokugcina esewumsakazi.
Wasuka lapho wajoyina esinye isiteshi sakuleli dolobha, uMgungundlovu 107 FM.
Ikhono lakhe ligcine limenze waqokwa njengenxusa yinkampani i-Always, okumenze wagcina esenikela ngamaqakelo ezikoleni zasemalokishini aseMgungundlovu.
