SEKUDALULWE imininingwane ‘ngokuhlafuna’ kwe-EFF ezimalini ezadliwa kwiVBS Mutual Bank okuyibhange elizovalwa ngemuva kokuchuthwa izigidi zamaRandi.
Ngokombiko odalulwe yi-website ephenya ngezePolitiki kuleli iDaily Maverick, i-EFF ithole imali ebalelwa kuR1.8 million isebenzisa amalungu omndeni womholi waleli qembu uMnuz Julius Malema nephini lakhe uMnuz Floyd Shivambu.
Kuthiwa i-EFF ithole le mali ngezinkampani ezisetshenziswa njengamakhethini okufihla izimali ezingena kuleli qembu.
Ngokombiko, isithabathaba somuzi okwakuhlala kuwo uMalema eSandton, eGoli, wakhokhelwa uR430 000 ngemali okusolwa ukuthi ivela kwiVBS Bank.
Lendlu kuthiwa ithengwe yi-EFF kanti isibhaliswe ngaphansi kwayo. Umbiko uveza ukuthi umfowabo kaShivambu, uMnuz Brian Shivbambu, nomzala kaMalema uMnuz Matsobane Phaleng ibona abaphethe izinkampi okufihlwe ngazo ukungena kwezimali.
UBrian ungumqondisi weSgameka Trading Pty Ltd, uPhaleng yena kuthiwa ungumqondisi weMahuna Investments Pty Ltd. Ngokombiko i-EFF isebenzise lezizinkampani ukufaka imali.
Kumbiko owathulwa umphenyi weBhange loMbuso, u-Advocate Terry Motau, kwavela ukuthi uBrian wathola uR16.1 million kwiVBS. Kwavela izinsolo zokuthi kule mali uR10 million waphelela kuFloyd Shivambu, okuyinto ayichitha. Esithangamini nabezindaba ngenyanga edlule uMalema ephendula kulolu daba naye wathi ayikho imali eyatholwa yiqembu ivela kwiVBS.
Kulo mbiko wakamuva ucele ukuthi imibuzo ngendlu eseSandton ibhekiswe kwi-EFF hhayi kuye.