UTHISHA kaGrade 7 KwaCutshwayo Primary, eTshelimnyama, uNombuso Mfeka Mthembu, usheba ukufundisa nokulingisa emidlalweni yethelevishini, nokukhangisa ngengqephu.
UNombuso (47), ofundisa isiNgisi ne-EMS, uzakhele udumo kubabukeli bethelevishini ngokudlala indawo kaNkk Zondi (uma kaJabulile) kuMkhokha The Curse, eyilungu leMaluju kwiMbewu The Seed, ekaNesi Zungu kwiDurban Gen, nekaMaMkhize kwiThe Estate.
Ubuye walingisa nasemafilimini akuleli nawaphesheya, nasezikhangisweni zethelevishini. Nakuba kunjalo le ntokazi ithi iyazifela ngokufundisa kangangoba abaphathi bayo baze bamkhetha ukuba abe ngomunye wothisha abahamba phambili ekuhleleni inkundla yokucobelelana ngolwazi yothisha abafundisa izilimi.
"Ngaphezu kwalokho ngibuye ngehlulele emqhudelwanweni wesifunda woMnyango wokuHlumeleliswa kweziMilo osuke wenzelwa iziboshwa, iFundza Mzantsi Language Championship iminyaka emihlanu."
UNombuso wafunda eKranskloof Primary, eMcopheleli Primary, Umqhele Secondary kodwa waphothula uGrade 12 eLanga High.
Waqala ukufundela ubuthisha eNdumiso College of Education eMgungundlovu, wadlulela kwiB Ed Honours neMasters of Education e-UKZN Edgewood Campus.
Njengamanje uNombuso usemzuliswaneni owandulela owamanqamu ka-2025 Mrs Curve.
Uthi esakhula wayengazi ukuthi uyoke afinyelele kulesi sigaba asekuso sokudlana imilala neziphalaphala ezidudule zakuleli. Uthe lo mqhudelwano uqale nyakenye kodwa umzuliswano owandulela owamanqamu ukhethwe ngoFebhuwari.
"Uma ngingahlabana ngalesi sicoco, ngiyathembisa ukuthi ngiyohlomisa futhi ngikhuthaze intsha nabadala bemikhakha ehlukahlukene. Ngiyohlela izinkundla zokucobelelana ngolwazi nentsha yesifazane ukuze iziqonde ubuyona. Ngiphinde ngimeme ongoti beminxa ehlukahlukene ukuba bezocija amantombazane ngamakhono futhi bawaqeqeshe ukuze akwazi ukuzinakekela ngakwezempilo."
Uthe inhloso yakhe ngalesi sicoco ukuyomela iNingizimu Afrika, emncintiswaneni womhlaba uMrs Curve Globe.
Uthe uyobuye aqhube imicimbi yokukhangisa ngengqephu yabazimukile.
"Okwamanje ngikhangisa ngemikhiqizo yabaxhasi bethu.
Unxuse abantu bakuleli ukuba bamvotele ngokuthumela iSMS ebhalwe ukuthi VOTE NOMBUSO ku-35180 nanoma yikangaki ngoba ibiza uR3 iyodwa.
Ukuvota kugcina ngoJuni 5 kulo nyaka.
