KUFE abayisikhombisa kwalimala kabi ababili ngesikhathi iloli ebelithwele amalahle lishayisana netekisi ebelithwele amakholwa ngeSonto ebusuku.
Ingozi yenzeke ku-R50 phakathi kweLeandra neStanderton eMpumalanga.
Kuthiwa iloli belihambisa amalahle eLeandra lisuka eStanderton ngesikhathi lishayisana netekisi ebelilayishe amakholwa abesuka KwaZulu-Natal elubangise eDevon.
Imibiko evela endaweni yesigameko ithi iloli lingene itekisi ngakwesokudla, kwafa abayisikhombisa.
Umshayeli wetekisi ungomunye wabaphangalele engozini. Umnikazi wetekisi kuthiwa wazisiwe ngalesi sigameko.
“Kusize ubuchwepheshe obulandela umkhondo wemoto ukuze kutholakale imininingwane yomnikazi wetekisi, wabikelwa ngale nhlekelele. Kuzoba lula nokuthola izihlobo zamakholwa ashonile ngoba asuka ndawonye,” kusho uBrigadier Selvy Mohlala okhulumela amaphoyisa eMpumalanga.