SIHLANGANISA iminyaka emine kule nyanga isiteshi sezindaba esasungulwa ngabansundu.
INewzroom Afrika ifike kwazwakala embonini yezindaba njengoba kuyisiteshi esasungulwa ngabantu abasha uThabile Ngwato oyiCEO yesiteshi noThokozani Nkosi. Abaningi babona ukusungulwa kwalesi siteshi njengethuba elihle lokuthola izindaba ezisakazwa ngobunjalo bazo kungekho ukuchema nokwenzelela ngenxa yobuhlanga.
Kule minyaka emine ababukeli bathokozele ukubona ubuso ababujwayele nobusha nokuphakwa kwezindaba ngendlela esheshayo ezingxenyeni ezahlukene kuleli.
Ezinyangeni ezimbalwa ezedlule, kubonakale intuthuko isiteshi sizala inkonyana yesiZulu, Izindaba Zethu.
Nakhona kulesi siteshi sesiZulu, kuboshelwe abafundi bezindaba abaziwayo nabajwayelekile. Babuye babuyisa nentandokazi uNoxolo Grootboom osewathatha umhlala phansi.
Umphathi walesi siteshi uThabile Ngwato uthe bakuthakasele kakhulu ukukhula kwesiteshi
"Isasasa nothando esilutholile yikona okuzale inkonyana yezindaba zesintu kuMzansi Wethu (DStv Channel 163). Lokhu kubonisa izinguquko eziza nokukhula kweNewzroom Afrika njengoba ihlanganisa iminyaka emine,“ kusho uNgwato.
Ngenyanga ezayo kuzobonakala izinguquko kulesi siteshi njengoba kubuya uCathy Mohlahlana owathatha ikhefu lokuyobeletha.
UCathy uzongena noStephen Grootes phakathi kuka-5 no6 ntambama anduba ajoyinwe uThembekile Mrototo phakathi kuka-6 no8 ebusuku. Ngo6 ntambama bazobe begoqa konke okwenzeke osukwini ngama-video azofakwa ezinkundleni zokuxhumana babuye babheke nodaba lokucishwa kukagesi okuhleliwe nomthelela wawo.
Uzobe eseqhubeka yedwa uMrototo kusuka ngo8 kuya ku9. UThabo Mdluli uzobe esethatha izintambo egoqa ubusuku phakathi kuka9 no12.
Olunye ushintsho luzokwenziwa ngoMgqibelo ntambama ngo7 lapho kufakwa ingosi yamaqophamlando.
UNgwato uqhubeke wathi lezi zinguquko zibonisa ukukhula kwalesi siteshi kanjalo nemizamo yabo yokuhlala beqhamuka nokusha okuhamba phambili.