ZIYAQONGA izinkulumo zokuhoxiswa kweMeya yeTheku, uMnuz Mxolisi Kaunda, okuthiwa inyamanambana ebuholini be-ANC besifunda. Umthombo okhininda izindaba ze-ANC, uthi uKaunda uzulelwa ngamanqe ngenxa yokuthi kunezikhalo zokuthi akabambisene nobuholi besifunda. Kuphinde kuvele ukuthi umphumela wengqungquthela ye-ANC KwaZulu-Natal umshiye esigangeni uKaunda.
Ubuholi besifunda buke bathi busanda kungena benza ushintsho, badiliza uMnuz Thanduxolo Sabelo kwesikasotshwebhu wesigungu somkhandlu. Esikhundleni sikaSabelo kufakwe uMnuz Nkosenhle Madlala oyiPhini likaNobhala we-ANC eThekwini. Igama likaMadlala liyavela njengomuntu ongase afakwe uma kuxoshwa imeya.
Kuvela lezi zindaba nje lusanda kusefa ulwandle kuhulumeni wesifundazwe ngesikhathi kubuywa engqungqutheleni. Kushintshwe undunankulu nabanye ongqongqoshe beminyango abasula belandelana. Imithombo ithi ushintsho lungase lwehle ngohologo lubheke kuMasipala weTheku.
UKaunda uyilungu lesigungu esiphezulu se-ANC esifundazweni, akekho ohlakeni lobuholi besifunda seTheku. UKaunda wafakwa emuva kokukhishwa kukaNkk Zandile Gumede owayeyimeya yeTheku.
Ngesikhathi kubhekwe engqungqutheleni, uKaunda waphumela obala ethi uhamba nohlangothi lukaMnuz Sihle Zikalala olwakhala ngaphansi embangweni wesikasihlalo.
“Into azidonsela amanzi ngomsele ngayo, yilokhu kufaka kwiFacebook ukuthi uhamba nobani engqungqutheleni. Kukhona nenkinga yokuthi akazwani kahle nobuholi besifunda, uma buphakamisa izinto yena uziyisa esigungwini sesifundazwe,’’ kusho umthombo.
Okhulumela i-ANC eThekwini uMnuz Mlondi Mkhize, uthe zingamampunge izindaba zokuthi bafuna ukuxosha uKaunda.
“Kunabantu nje abafuna ukuzwa umoya ukuthi uya ngaphi, ngoba uKaunda wabeka umbono wakhe ngengqungquthela futhi unelungelo lalokho njengelungu lenhlangano. Uzokhumbula ukuthi indaba yezimeya zomasipala abakhulu iphethwe kuzwelonke,’’ kusho uMkhize.
Okhulumela iMeya uKaunda, uMnuz Mluleki Mntungwa uthe kusuke kube nzima ukuthi baphendule into engaziwa ukuthi iqhamukaphi. Uthe imeya ayiyazi indaba yokukhishwa esikhundleni.
