IBHEMILE kwabazotholakala ukuthi benza inkohlakalo ngesikhathi kwakhiwa eminye imitapo yolwazi KwaZulu-Natal njengoba uMengameli Cyril Ramaphosa esejube uphiko oluphenya amacala enkohlakalo iSpecial Investigating Unit (SIU), ukuthi luphenye.
Lolu phiko luyalelwe nguRamaphosa ukuthi luphenye uMnyango wezemiDlalo, ubuCiko namaSiko esifundazweni ngokwakhiwa kwemitapo yolwazi eyisishiyagalombili kanjalo nokusatshalaliswa kwezincwadi kuyona.
Uphiko luzophenya ukuthi ngabe ayisebenzanga yini ngendlela engafanele imali yomphakathi ngesikhathi kwakhiwa imitapo kusuka ngoJanuwari 1, 2020 kuya kuMashi 28, 2024.
Okhulumela i-SIU uMnuz Kaizer Kganyago, uthe umengameli ugunyaze ukuthi kuphenywe umnyango ukuze kubuyiswe imali yabakhokhi bentela eyalahleka.
Uthe bazophenya nethimba losonkontileka abasabalalisa izincwadi.
Uveze ukuthi imitapo yolwazi okuphenywa ukwakhiwa kwayo yiDukuduku Library, Nibela Modular Library, Kwankosi Khumalo Modular Library, Kwakhetha Modular Library, Mpembeni Modular Library, Ntunjambili Modular Library, Donny Dalton Modular Library, Mfekayo Modular Library neKwanzimakwe Modular Library.
“Siphenya nokuthi ngabe kwakukhona yini ukusetshenziswa kwemali ngendlela engafanele ngesikhathi kwenziwa le misebenzi. Siphenya ukuthi bakhona yini abasebenzi bakahulumeni abathintekayo, osonkontileka kanjalo nanoma ngubani othintekayo.”
Uthe bazokwenza izincomo zokuthi ngomuso kungavikelwa kanjani ukulahleka kwemali yomphakathi.
“Ngokomthetho esiyothola ukuthi bayathinteka, sizobadlulisela ophikweni lwezokushushisa iNational Prosecuting Authority (NPA), ukuze ibhekane nabo. Sigunyazwe ngumthetho olawula iSIU, ukuthi sishushise abathintekayo enkantolo enkulu,” kusho uKganyago.
Lumatasa lolu phiko kulezi zinsuku njengoba lusanda kujutshwa nguRamaphosa ukuthi luphenye izinto ezenzeka eMnyangweni wezaseKhaya mayelana nokukhishwa kwezimvume zokuba kuleli luphenye nakwaPrasa.