ISAHAMBA phambili
iKwaZulu-Natal (KZN) ngezibalo zababulawe yiCoronavirus, osekuvele ukuthi bangu-257 asebetholakale ukuthi banalolu bhubhane kulesi sifundazwe.
Izolo umnyango wezempilo uveze ukuthi bawu-12 abashone kuzwelonke, abayisikhombisa kungabaseKZN. Oshone kamuva owesilisa oneminyaka ewu-57 waseWestern Cape ongeniswe esibhedlela ngo-Ephreli 5.
UDkt Zweli Mkhize onguNgqongqoshe wezeMpilo, uthe sebengu-1 686 abahaqwe yilolu bhubhane kuzwelonke, okusho ukuthi izibalo zinyuke ngabangu-31 kusukela umnyango ugcine ukumemezela izibalo.
Ngokwezibalo ezikhishwe uMkhize kuvela ukuthi iGauteng isahamba phambili ngabangu-713 abahaqekile, kulandele iWestern Cape ngabangu-462. Bangu-89 eFree State, 32 e-Eastern Cape, 19 eLimpopo, 18 eMpumalanga, 11 eNorth West nabayisishiyagalombili eNorthern Cape. Bangu-77 okungakacaci ukuthi ngabakuziphi izifundazwe.
Kwabashone kamuva kukhona nesalukazi esineminyaka engu-82 saseWestern Cape, okuthiwa sangeniswa egunjini labagula kakhulu ngoMashi 29.
“Umufi wangeniswa esibhedlela exinwe ubuhlungu bomzimba nomphimbo, ukukhwehlela nenkinga yokuphefumula. Umufi oneminyaka engu-86 naye oshone kamuva, wangeniswa esibhedlela ngoMashi 26 exinwe inkinga yokuphefumula. Sidlulisa amazwi enduduzo emindenini, sibonge nakubahlengikazi abebebalekelela ukubelapha,” kusho uMkhize. NgeSonto uMkhize ubehlangene nekomiti le-African Union (AU), elibhekene nokunqanda lolu bhubhane, obekukhona noMengameli Cyril Ramaphosa onguSihlalo we-African Union (AU).
Kulo mhlangano bekukhona ongqongqoshe abangu-10 bamazwe ahlukene angaphansi kwe-AU noMqondisi we-Africa Centres of Disease Control and Prevention, uDkt John Nkengasong.
UMkhize uthe bonke bavumelene ngokuthi ukubhebhetheka kwalolu bhubhane kuzoletha umonakalo omkhulu emazweni ase-Afrika avele ebhekene nobubha.
“Wonke amazwe ebesihlangene nawo aveze imibono yawo ngokuthi singalwa kanjani nalolu bhubhane. Sizibophezele ukuthi sizoqhamuka nezindlela zokuthuthukisa ezempilo, sivikele nomnotho wethu,” kusho yena.
Uthe bahlangane nabelaphi bendabuko abazibophezele ukusizana nomnyango kulolu bhubhane nokuqwashisa ngalo emphakathini.
UMkhize uthe abelaphi bendabuko bakhale ngokungafakwa ngaphansi kwabasebenzi abenza imisebenzi ebucayi.
“Bathi kunabantu abathembele kubona ngokuthola amakhambi. Bakhale ngokuthi njengoba kunothaqa, amakhasimende abo asenkingeni ngoba awakwazi ukulanda amakhambi. Sivumelene ngokuthi sizoqhubeka nezingxoxo ukubheka ukuthi sisebenza kanjani nabo sisabhekene nalesi simo,” kusho uMkhize.