AMAHUBO okudumisa nemidanso yokujabulela ukusongwa kwempelasonto yomKhosi wePhasika yiyona ndlela yokujabula egqame emcimbini wokuvala iPhasika nemindeni iGospel in The Park Family Day, obuseSunkist Lawns, eNorth Beach, eThekwini ngoMsombuluko.
Kulo mcimbi, onhloso yawo wukuhlanganisa abantu baseThekwini namaphethelo nemindeni yabo ukujabula ndawonye, bekungokokuqala wenziwa nonyaka, kanti ubonakale uqala ngesasa njengoba nakuba uqale wambezeleka mbijana kusahlelwa, kepha abantu bagcine bethelekile ngobuningi babo; iningi lihamba nezingane zalo, ebezenzelwe imidlalo ehlukene.
Umcimbi uvulwe wuThandeka Dube, oshaye amanoni ehlukene okudumisa okukhona kuwona nelithi Ungcwele. Emva kwakhe kungene ilungu leqembu lomculo wokholo iJoyous Celebrations, uStha MaNyambose, naye wajabulisa abantu ngamanoni ehlukene.
Kuchwaze inkundla, abantu beza begijima eduze ne-stage ukuzobonela eduze intokazi yodumo lakuma-Idols uSniezy Msomi, naye ofike wenza adume ngakho eqhulula izingoma zendumiso, okukhona kuzo enezinhlamvu ezithi “yizwa nkosi umkhuleko wami, ulalele ukufuna kwenhliziyo yami” - okubonakale iyithola indawo kwizethameli zomcimbi.
Emva kwalapho kubuye elinye ilungu leJoyous Celebrations, uNelisizwe Sikhosana, walandelwa wuMfu Sebe Nzuza wodumo lwengoma ethi Nawe Ungamthanda, okuchwaze abantu futhi bayicula kanye naye eseyishaya e-stage. Kushintshe unyawo sekunandisa uDJ Happygal, ohlanyise izihlwele ededela izingoma ezithandwayo zoMaskandi.
Umhleli walo mcimbu uNkk Nompumelelo ‘Mpume’ Msomi uthe kumjabulisile ukubona lo mcimbi, oxhaswe wuMasipala weTheku, uba yimpumelelo ikakhulu ngoba akuvamile ukuthi kube nemicimbi enjena lapho abantu bejabulela umculo wokholo beshaywa wumoya ebhishi.
“Manje sengibheke ukuthi umcimbi wami ukhule kakhulu kunalokhu, engithemba ukuthi baningi nabanye abazovela bewuxhase ukuze ube mkhulu kakhulu kunegiya oqale ngalo nonyaka,” kusho uNksz Msomi.
Isolezwe lihambe emcimbini kusalindelwe ukuthi kunandise uLungelo Hlongwane, Malusi Mbokazi, Andile KaMajola noBabo Ngcobo. Uhlelo lomcimbi beluphethwe wuMthoko Ndlovu noSimunye ChurchBoy.