INGASE ixazululeke inkinga yokushoda kwezindawo zokuhlala izitshudeni eNyuvesi yaseZululand, oNgoye, njengoba uMnyango weMfundo ePhakeme ukuQeqesha neSayensi wenza ucwaningo ngezindlu ezizokwakhiwa.
Lokhu kuvezwe nguNgqongqoshe walo mnyango, uDkt Blade Nzimande, ephendula umbuzo welungu le-EFF ePhalamende, uMnuz Thokozani Makhosonke Langa, obuze ngezinhlelo zomnyango enkingeni yokushoda kwezindawo zokuhlala kule nyuvesi. UNzimande uthe basebenzisana nenyuvesi ukwenza lolu cwaningo.
“Ucwaningo lufaka ukwakha izindlu zokuhlala ezizoba nemibhede engu-3 500 ophikweni laKwaDlangezwa. Sifuna ukuqeda ngenkinga ebhekene nenyuvesi yokuntuleka kwezindawo zokuhlala,” kusho uNzimande.
Uthe ukulungisa isimo ngokushesha, kukhishwe imali enguR235 million ukwakha izindlu ezizoba nemibhede engu783 KwaDlangezwa njengoba kusenziwa lolu cwaningo.
Ubalule nokuthi usekhona usonkontileka emagcekeni alesi sikhungo ukusheshisa uhlelo.
“Ucwaningo lwethu lubheka ukuthi sakhe nezinye izindlu ophikweni lwaseRichards Bay. Sifuna kube nemibhede engu-1 500 ophikweni lwaseRichards Bay kanjalo nolaKwaDlangezwa.”
Uthe uma sekuphothulwe ucwaningo, bazobheka besebenzisana nesikhungo ukuthi iyiphi indlela engenza ukuthi iningi izitshudeni zihlale ezindaweni ezenganyelwe yinyuvesi.
UNzimande usho lokhu nje, sekubikwe kaningi ngenkinga yokushoda kwezindawo zokuhlala kule nyuvesi.
Minyaka yonke cishe kuba nesiteleka kule nyuvesi izitshudeni zikhala ngezindawo zokuhlala njengoba ezihlala emiqashweni eseduzane nenyuvesi zibanjwa inkunzi, ziyagqekezelwa ziphucwe imali, amaselula nama-laptop.
Ekuqaleni konyaka umbhikisho ususwe wukubulawa kwesitshudeni esihlala kule miqasho.
Lezi zitshudeni zikhala ngeqeqebana lezigebengu ezizibiza ngamadabuka, ezihlupha ngokuzibamba inkunzi nokugqekeza lapho kuhlala khona lezo eziqashile. Inyuvesi yakhala ngokuthi ayikwazi ukungenelela njengokuhlinzeka ngezokuphepha ezindaweni ezingekho ngaphansi kwayo.
UNzimande wathi kunezinhlelo zokulula le nyuvesi ngokuthi kube nophiko olusoLundi.