UNGAZENYEZI ngokuthi uthanda imali. Ukuthanda imali kuhle uma uzoba namasu okuyenza, ungayebi.
Lokhu kushiwo wusomabhizinisi osemnkantshubomvu, uNkk Nonhlanhla Mjoli-Mncube ozobe eyisikhulumi esiqavile emcimbini wabesifazane ohlelwa Isolezwe, iNtandokazi, ozobe useCoastlands Hotel eMusgrave, eThekwini ngoMgqibelo.
UNkk Mjoli-Mncube ungumqondisi wezinkampani zomndeni, iMjoli Development Company ne-Eziko Investments. Le nkampani ezibhaliswe kwiJSE zenza izinto eziningi, kuzo okubalwa izimayini, ubunjiniyela, ukwakha, umshwalense, ezobuchwepheshe nezolimo.
UNkk Mjoli-Mncube, uthi ukuthanda imali akusona isono uma uhlome ngamasu okuthi uyenza kanjani, okungafuneki wukuthi ube yiqola elicuthele ukudla imali elingayisebenzanga.
Uthe kulo mcimbi uzobe egxila ezintweni ezincane kodwa ezinqinda impumelelo kwabesifazane.
"Abantu besifazane banomkhuba wokuzibeka emuva, noma isidingo singekho ngoba bajwayela ukulandela ngemuva. Kukhona abantu besifazane okuthi uma kukhulunywa ngezikhundla zokuhola, bathi kabanaso isipiloyoni sokuphatha kodwa emasontweni baphethe.
Ukuhola kuyefana noma ngabe yisesontweni noma ngabe yisestokofeleni. Singabantu besifazane sigcina sisilele emuva ngoba siyazingabaza kodwa amadoda ayaziveza ukuthi into ayayifisa.
Kwesinye isikhathi awina ngakho lokho, kusale umuntu wesifazane onekhono nolwazi. Uma kusemsebenzini akekho umphathi ovuka aye emsebenzini ethi eyobheka ukuthi umsebenzi othile ngabe uyafuna yini ukungena esikhundleni sokuphatha.
Kukuye umsebenzi ukuthi aziveze ukuthi ukulungele lokho. Uma kunezinkundla zokucobelelana ngolwazi, zama ukuya lapho obonayo ukuthi kunabantu abenza into engakunika inselelo," kusho uNkk Mjoli-Mncube
Uqhube wathi kuningi abesifazane abangakwenza uma bengase baqonde ukuthi kayikho into abangeke bayenze uma bezimisele.
"Isinqumo sokuthi wufuna ukwenzani empilweni, siphuma kuwe. Ungalibali ukubala izinto ongenazo, njengothi ngeke ngisakwazi ukufunda sengimdala.
Ngeke ngikwazi ukwenza lolu hlobo lwebhizinisi ngoba ngisemakhaya. Sebenzisa lokho onakho ngaleso sikhathi, ungabheki izinto ongenazo ngoba kawunazo," kusho uNkk Mjoli-Mncube.
Uthe enye into enqinda impumelelo kwabesifazane wukuba nesikweleti esingenasidingo.
"Zikhona izikweleti ezinesidingo, ezifana nokuthenga umuzi ngoba ukuthenga umuzi kungukutshala imali. Uma wenza isikweleti ngokufunda kungukutshala imali ngoba uyazithuthukisa kodwa ukuba nesikweleti esitolo sezingubo, kungokumosha imali okumele ngabe uyibekela ikusasa.
Akuwenzi umqondo ukujabulela ukuthenga izingubo ngemali ongenayo. Leyo mali uyikhokha isinkulu, okusho ukuthi umosha imali okumele ngabe uyibekile. Uyipha isitolo lesi okwelete kuso, engabe uthenga izingubo uma usunemali," kusho yena.
Uthe okunye abantu besifazane okumele bakuqonde wukuthi ngeke unothe ngemali oyihola emsebenzini. Ukuze ikunothise leyo mali yitshale ngokuthi wenze okuthile okuzokwakhela umnotho.
UNkk Mjoli-Mncube uke waba semabhodini ezinkampani eziningi, okubalwa iBhange iCapitec, Pioneer Foods Group, ibhange i-ABSA, iTongaat Huletts Group nezinye eziningi.
Ungumsunguli wenhlangano yosomabhizinisi besifazane, iSouth African Women Entrepreneurs (Sawen). Uke waba wumeluleki wezomnotho kaNkk Phumzile Mlambo- Ngcuka ngesikhathi eseyiphini likamengameli wezwe.
Ngakwezemfundo uNkk Mjoli-Mncube une BA Degree ayithole eFort Hare University, iMasters Degree in City and Regional Planning ayithole e-University of Cape Town, uke waba yingxenye yabafunde ngeFellowship in Urban Studies (Spurs) eMassachusetts Institute of Technology, e-United States of America, unePost Graduate Certificate in Engineering Business Management ayithole eWarwick University e-United Kingdom nezinye eziningi.
