IMOTO: TOYOTA COROLLA HYBRID
ITOYOTA Corolla yethulwe eNingizimu Afrika ngo-1975 futhi sekudayiswe angaphezulu kuka-570 000 kusuka lapho.
Le ntandokazi ihlukene ngezinhlobo futhi njengoba umhlaba usushintsha nje sekungenisa izimoto zikagesi, iCorolla ayisali ngaphandle kulolo shintsho.
Ngonyaka odlule kwethulwe iCorolla eyi-hyrbid okusho ukuthi ihamba ngenhlanganisela yenjini kaphethroli nekagesi.
Lokhu kwenziwe kwi-sedan kuphela kodwa kulokhu sekwehliselwe nakwiCorolla Hatch. Phambilini iCorolla Hatch ibitholakala kuphela ngenjini kaphethroli engu-1.2 litre turbo kaphetholi engasekho.
Esikhaleni sayo kufakwe engu-1.8 litre petrol-electric hybrid ebitholakala kwiCorolla sedan. Umehluko wayo nokho ukuthi isinamandla athe xaxa ngo-13kW njengoba esengu-103kW. Abakuqhakambisayo ukonga kwayo njengoba ngo-100km bethi idla amalitha kaphethroli angu-3.5.
Ithule njengoba kulindelekile uma isuka nokuthi uma uyinyathela uyizwe injini kaphethroli isebenza. U-gearbox ozishintshayo oyi-CVT uyenza ibe nomsindo uma uyinyathela mawala kodwa umsindo wayo awumkhulu njengakwezinye izimoto.
Enye injini ekhona yi-2.0 litre kaphethroli enamandla angu-126kW ne-torque engu-203Nm. Nayo isebenzisa u-gearbox ozishintshayo oyi-CVT.
Zombili ziyatholakala kwi-sedan.
ICorolla Hatch bathe ukuyishintsha lapha nalaphaya indlela ebukeka ngayo. Ngaphambili amalambu angamaBi-LED bawashitshile mbijana kanjalo nakubhampa ngemuva. Amarimu aphakathi kuka-16 no-18 inch. Kunemibala okhetha kuyo yomzimba futhi kunezinye ezinokhakhayi oluhlukile kunombala womzimba.
Ngaphakathi ine-7 inch touchscreen infotainment system oxhuma kuyo iselula nge-Apple CarPlay, inendawo yokushaja ngaphandle kwentambo nezindawo zokushaja nge-USB ezengeziwe nangemuva.
Ezokuphepha nazo zinyusiwe njengokuthi ibhreke uma ibona sengathi uzoshayisa ngesikhathi uhlehla.
Lezi zinguquko zenziwe nakwiCorolla sedan.
Intengo:
Corolla Hatch 1.8 Xs Hybrid - R 490 900
Corolla Hatch 1.8 Xr Hybrid - R 528 400
Corolla Hatch 1.8 Xr Hybrid Bi-tone - R 538 800
Corolla Hatch 2.0 Xr CVT - R 517 100
Corolla Hatch 2.0 Xr CVT Bi-tone - R 529 000
Corolla 1.8 Xs Hybrid - R 502 600
Corolla 1.8 Xr Hybrid - R 521 800
Corolla 2.0 Xr CVT - R 517 100
Zoke zifika ne-service plan yamasevisi ayisithupha noma u-90 000km. Ezikaphethroli zine-warranty yeminyaka emithathu noma u-100 000km kuthi i-hybrid ibe neyeminyaka eyisishiyagalombili noma u-195 000km.