Imibiko ikhomba ukuthi kuphelile ngeToyota Urban Cruiser eyintandokazi yemoto edayisa kuleli.
I-Urban Cruiser iqale ukudayisa kuleli ngoMashi ka-2021 futhi ngenyanga yayo yokuqala kuthengwe angu-977. Ngenyanga edlule ibe ngeyesithathu ukudayisa kakhulu kuthengwa angu- 1 820. Ilandele iToyota Hilux (3 336) neToyota Corolla Cross (2 014).
Isuselwe kwiSuzuki Vitara Brezza njengoba lezi zinkampani zinobudlelwano bokusebenzisana obuzale neToyota Starlet esuselwe kwiSuzuki Baleno.
Umbiko we-Autocar India uthe iToyota iqedile nge-Urban Cruiser.
Ithe isikhishiwe nakwi-website yayo futhi ayikho imoto ezovala isikhala sayo osekuhleliwe ngayo.
IToyota kuleliya zwe isanda kwethula i-Urban Cruiser Hyryder. I-Urban Cruiser Hyryder inenjini kaphethroli engu-1.5 litre kaphethroli nenye eyihybrid.
E-India ayikho iToyota Corolla Cross njengakuleli okukhona kuyo neyihybrid.
KwaToyota South Africa Motors basanda kutshela leli phephandaba ukuthi basakucabanga ukuyethula kuleli.
I-Urban Cruiser yakhiwa e-India.