Basibongile isiphakamiso sakwaToyota South Africa Motors (Tsam) sokunikwa imoto entsha ngemuva kokufelwa ngeyabo abangani abathathu abasohambeni olusuka eLondon belibangise eKapa.
Laba bangani okungoKaren, James noSpence sebechithe izinsuku ezingaphezu kuka-50 benqamula emazweni ase-Afrika ngemoto yabo iToyota Hilux abayethe ngokuthi wu-Edna.
Sebephenduke izilomo njengoba konke okwenzeka ohambeni lwabo bekunekela umhlaba ku-Instagram naku-TikTok.
U-Edna uthwele yonke imithwalo yabo kuhlanganisa nokokuqwala njengoba bebuye balale emahlathini.
Kwamanye amazwe abafika kuwo sebefike balaliswe mahhala emahhotela.
NgeSonto bafake i-video ezinkundleni zokuxhumana becela usizo ngoba ngesikhathi sebenqamula eNigeria bebheke eCameroon, u-Edna uvele wanqamuka phakathi.
Yilapho kwaToyota kuleli bephakamise ukungenelela ngokubathumelela iHilux GR-S III eyethulwe ngesonto eledlule.
NgoLwesibili emini laba baphendulile bathi bayabonga ngosizo kodwa bafuna u-Edna afike eKapa futhi bazozama ngakho konke ukuthi alunge.
"Asikwazi ukulaxaza u-Edna. Ungumama wethu futhi uyingxenye yethu. Siqale lolu hambo naye futhi sihlose ukuqeda uhambo naye. Asikwazi ukumyekelela manje. Uyahluleka kodwa uzokwazi ukwenza lokhu," kubhala laba.