UZOBONGA abalandeli bakhe ngekhonsathi umculi waseJohannesburg, uTyla owenze ezibukwayo ngonyaka odlule eqoqa izindondo, emicimbini emikhulu emhlabeni.
NgoJanuwari 18, uTyla uzojabulisa abalandeli bakhe ngekhonsathi ezoba eSunBet Arena, ePitoli. Abangeke bakwazi ukuhambela ikhonsathi bazokwazi ukuyibuka bukhoma kwi-Showmax ngoba izosakazwa emazweni awu-44, ase-Afrika.
UTyla ekhasini lakhe le-Instagram uveze injabulo anayo ngokuthokozisa abalandeli bakhe, wathi kusho lukhulu ukuthi baningi abazojabulela leli dili lomculo ngoba lizobe lisakazwa ngendlela elula kwabaningi.
Unxuse abaningi ukuthi bajoyine i-Showmax.
UYatish Narsi, oyisikhulu sezokukhangisa kwa-Showmax uthe kuyabajabulisa ukuthi ubuchwepheshe besimanje bubavumele ukuthi babeke ebalazweni iciko lakuleli elenza umcimbi wokujabulisa abathandi bomculo walo.
"Siyambongela uTyla ngokwenza umcimbi ofana nalona, okuyindlela yokuthi amemezele ukuthi ubuyile ekhaya ngemuva kokuhamba isikhathi esingangonyaka, ematasa phesheya kwezilwandle.
“Njengesiteshi lona umcimbi wokuqala ukuthi siwukhombise bukhoma. Ngakho sizibophezele ukuthi sikhombise into ecokeme, sithembisa abazobe bewulindele ukuthi ngeke size sibaphoxe. Sithemba ukuthi siqophe umlando ngabantu abazobe bewubuka, nokuzochaza impumelelo kithi nakuleli ciko,“ kuchaza yena.
Uqhube wathi okunye abakujabulele ukwethula umthwalo kulabo akade bekhathazekile ngokungabi yingxenye yomcimbi bukhoma, nabangangabazi ukuthi benzele abaningi izinto zaba lula.
Ngonyaka owedlule uTyla uklonyeliswe ngezindondo ezimbalwa okubalwa ama-Sama, Grammy Awards, MTV Music Awards, MTV Europe Music Awards, Billboard Music Award, nama-BET Awards.