USOMAHLAYA wodumo ezinhlelweni zethelevishini, uSiyanda "Gonzo" Maphumulo, uthembisa lukhulu ngomcimbi wakhe iFourth Man Showed Up eBlackrock Casino, eNewcastle ngoLwesihlanu ngo-7 ebusuku.
USiyanda yinsizwa ehlale ishiya izithameli ziphethwe yizisu ngamahlaya ayo, ansinsithekisa nomuntu ecashile.
"Yize kodwa ngizobe ngihlekisa ngedwa kodwa ngifihle induku emqubeni njengoba kunabanye osomahlaya engizobe ngihambisana nabo. Umuntu ongazofika kulo mcimbi uzobe enebhadi."
Uthe ziningi izinto azobe ehlekisa ngazo, ngisho nangobukhosi. USiyanda usezakhele igazi kule ndima yamahlaya kangangoba usebalwa nabanye bosomahlaya abangungqa-phambili eNingizimu Afrika.
Ubufakazi balokho, ukuhlabana kukaSiyanda ngenqwaba yemiklomelo emqhudelwaneni yamahlaya, okubalwa kuyo iSouth African Traditional Music Achievement (Satma) Awards, DStv Viewer's Choice Awards nakumaKZN Entertainment Awards.
USiyanda uqale ukuduma ngokuhlekisa kuJabule Ujule kuKhozi FM ngaphambi kokuvela ezinhlelweni zethelevishini ezinjengeDate My Family, Mzansi Comedy Nite neKasi Lami. Uthe amathikithi abiza uR200 noR300, kwabafuna ukuhlala endaweni yezitatanyiswa.