WONKE amabombo kubathandi bayoyonke inhlobo yomculo abheke kwiGatsheni Music Festival esezinkundleni zemidlalo zaseNcotshane, oPhongolo kusukela ngo-1 emini. Kuzoze kulamule ukuphuma kwelanga lakusasa ngeSonto, abaculi abahlukahlukene besina bededelana. Omunye wabagqugquzeli bale ndumezulu yomcimbi waminyaka yonke, uThobani Mmema, uthe izithameli zizobhema zikholwe ngoba babophele lonke uhlobo lomculi osezingeni elicokeme. Uthe konke sekumi ngomumo ngamalungiselelo nangezinhlelo.
Kule ngqophamlando yomcimbi kuboshelwe uKhuzani, Igcokama Elisha, Dladla Mshunqisi, Qwabe Twins, Stability, Jumbo, Intaba YaseDubai, AmaSiblings, DJ Sox, DJ Zaizo, Saudi, Thokozani Langa, Mroza Van Damme, Ithwasa Lekhansela, Imfezemnyama, AmaYellow Bone, Ngizwe Mchunu, Ntencane, Inkosi Yamagcokama, Jaiva Zimnike nabanye.
UThobani unxuse osikhwiliphambananobhoko ukuba base bangalokothi babeke imiconjwana yabo ngoba ezokuphepha zizobe ziqinile. Ngakho udonse ngendlebe abafuna ukutheleka behlome ngezikhali ezinhlobonhlobo ukuba bahambele kude neGatsheni Music Festival ngoba bazolala namhlanje bebaliwe.
Esephetha uthe abantu abaphuthume eTicketPro nasezitolo zaseSpar ngoR100 (General), R400 (VIP) nangoR800 (VVIP) ngoba ngokuhamba kwesikhathi azobe esetholakala esangweni ngoR150,R400 nangoR1000.