LUBHEKWE ngabomvu uchungechunge lwamakhonsathi esihlabani somculo wokholo neR&B, uBebe Winans, kuleli.
Kuchwaze izinkundla zokuxhumana ngesikhathi lo mculi odume umhlaba wonke etheleka e-OR Tambo International Aiport, eGoli kuleli sonto. UBebe Winans uzovalelisa kuleli ngendumezulu yochungechunge lwamakhonsathi olubizwa nge-It All Comes Down To Love Tour.
Ubufakazi bokuthi ulindelwe ngezandla ezifudumele kufakazelwe ukuthengwa wonke amathikithi asemcimbini oseSunBet Arena, okuze kwaphoqa ukuba abagqugquzeli bengeze elinye ikhonsathi e-Emperors Palace, eKempton Park ngoDisemba 17.
UBebe Winans uzoqala ukunandisa eMoses Mabhida Stadium ngoDisemba 9, eThekwini, adlule eGrandwest Arena, ngoDisemba 15, eCape Town naseSunBet Arena, ePretoria ngoDisemba 16 bese imbenge eyiphothula e-Emporors Palace ngeSonto elilandelayo.
"Wuchungechunge lwamakhonsathi lokugcina lukaBebe Winans, eNingizimu Afrika. Ngicabanga ukuthi wonke umuntu ufuna ukuba yingxenye yomcimbi oyingqophamlando. Njengabagqugquzeli bendumezulu yamakhonsathi, sijabule kakhulu ngokuba ngabantu bokugcina ukuletha uBebe Winans, eNingizimu Afrika. Injabulo kaBebe ngalolu chungechunge, isenze sakholwa ukuthi sathatha isinqumo esifanele futhi abalandeli bakhe bazobhema bakholwe," kuchaza umgqugquzeli, uThabiso Magashwa.
UBebe uzobhulelwa amazolo ngamaciko akuleli, okungoJudith Sephuma, Phindi P, Mashata noDJ Young kanti uhlelo luzobe luphethwe wumsakazi weKaya FM, uTbose Mokwele.
Esephetha uThabiso uthe amathikithi atholakala eTicketPro, Spar nasePayZone ngemali esukela kuR490 kuya kuR1490.