UHLATSHWE wukugula umsakazi weGagasi FM, uSiphesihle “DJ Sphe Live” Shabalala ongazwakali emoyeni kulezi zinsuku.
UDJ Sphe sekuphele amasonto amabili engazwakali ezinhlelweni zakhe.
Wethula uhlelo iGagasi Music Session House ngo-8 kuya ku-10 ebusuku ngoLwesibili. Uphinde enze ne-Urban Top 40 ngo-9 kuya ku-1 emini ngoMgqibelo ngokubambisana noPenny Ntuli.
Emasontweni amabili edlule i-Urban Top 40 yayibanjwe nguNjabs Zwane noHeazy Madida bengekho bobabili ngoMgqibelo. IGagasi Music Sessions House yona ngakolunye uhlangothi ibanjwe nguSizwe Sibisi.
Ngempelasonto eyedlule i-Urban Top 40 ibibanjwe nguNjabs Zwane yedwa. UPenny yena ngakolunye uhlangothi ubeseMtshezi lapho bezibuye ziphonswe kuye khona izintambo.
Ukugula kukaSphe Live kwaziwa ngabathile kwiGagasi njengoba abanye abakhulume naleli phephandaba bethe abamazi ukuthi ukuphi.
Omunye ukuvezile ukuthi uyagula njengoba engazwakali emoyeni.
“Uyagula akekho nje ukubo eMnambithi lapho elulamela khona. Unebhadi yena ngoba nangonyaka odlule ngesikhathi ethi uzoqala uhlelo olusha wavele wagula,” kusho umthombo. Kugcine kungatholakalanga ukuthi uphethwe yini.
Okhulumela isiteshi uKhulekani Shandu ukuqinisekisile ukuthi uyagula lo msakazi oke wenza uhlelo iMidday Buffet kwiVibe FM.
“Uhlabe ikhefu lokugula. NangoLwesibili ubanjelwe nguSizwe Sibisi ohlelweni,” kusho uKhulekani.
“Akwaziwa ukuthi uzobuya nini kodwa njengesiteshi simfisela ukululama okusheshayo.”
Omunye umthombo weSolezwe uthe kungenzeka abuye maduze ngoMgqibelo ngoba eseyalulama.