UKUHAMBA engena imizi ngemizi eNanda, eNewtown A, la azalwa khona enxenxa abantu ukuthi bamvotele, yikhona okumenze wakhala wemuka nendondo yeBest New Artist emcimbini amaMetro FM Awards alo nyaka uNontokozo Mkhize.
Leli ciko lishiye abaningi bebambe ongezansi ngengoma yalo ethi Moyo Ngcwele eliyicule kulo mcimbi ngesikhathi kukhunjulwa amaciko asanda kudlula emhlabeni.
UNontokozo uthi naye umzuzu angeke aze awulibale owenzeke kumaMetro FM, njengoba usho lukhulu kumuntu osanda kungena emkhakheni wobumnandi.
“Emculweni ngiqale ngo-2017 la bengisebenza khona nabaculi abahlukene bokholo okubalwa kubo uMthunzi Namba, Benjamin Dube nabanye. Ngisebenze kakhulu futhi emcimbini wamaCrown. Kuthe ngonyaka odlule, ngaqala ngakhipha ingoma yami yokuqala ethi Be Strong nengapika kuyo uNomfundo Moh. Ukuba sesikoleni kungenze ngangagxila ngale ndlela engifuna ngayo kulo mkhakha kodwa kulo nyaka ngikhethe ukuthi ngigxile emculweni, ngempela lokho kuyangisebenzela,” kusho uNontokozo.
Uthe ngoMashi walo nyaka kula akhiphe khona ingoma ethi Moyo Ngcwele nokuthe ekuqaleni kwale nyanga wakhipha enye ethi Imisebenzi apike kuyo u-Aymos.
“Ngizimisele ukuthi kulo nyaka ngikhiphe umsebenzi omningi ukuze ngijabulise abalandeli bami. Ukuthola le ndondo kungenze ngabona uthando abanalo ngami, kwangifaka ugqozi lokuthi ngisebenze nakakhulu. Namanje ngisathukile kodwa ke ukuzikhandla kwami kuthela izithelo manje. Ngisazobuyela emphakathini wangakithi ngiyowubonga ngokwenze kimi,” kuchaza yena.
Uthe abaculi abafana noKelly Khumalo, Afrotraction noMbuso Khoza ngabanye afisa ukusebenza nabo ukuya ohambili.