UMSAKAZI woKhozi FM, uTshatha “ Khathide” Ngobe, wembese waphinda wakhehla ingoduso yakhe engumlingisi, uSibongimpilo Sikhosana, emcimbini obuseLimehill, eMnambithi, izolo.
UTshatha ushayela uhlelo lwantambama, kusuka ngo-3 kuya ku-6 phakathi nezinsuku, kulesi siteshi somsakazo kanti ingonduso yakhe ilingisa emdlalweni omusha, uZulu Nomhlaba, kuMzansi Magic.
Lezi zithandani, ezinengane ndawonye, sezineminyaka zithandana.
Emcimbini wayizolo bezizinyaziswe yizimenywa ezikhethekile, imindeni, izihlobo nabangani. Kwabebekhona kubalwa uMengameli we-IFP, uVelenkosini Hlabisa, usomabhizinisi uBonny Ngubane, umlingisi uSbonile Ngubane, owaziwa ngendawo kaKhathaza kuZalo, umholi we-Action SA eKZN, uZwakele Mncwango, uXolani Mcineka, ongumhleli weMpucuzeko Maskandi Festival, umculi kamaskandi, uKhuzani, uMlwazet weVibe FM, uKini Shandu nomngani kaTshatha omkhulu, uDoh Mabaso.