UMLINGISI wodumo kwiDurban Gen noZalo, uBhekisizwe Mahlawe, uhlabane ngomklomelo weBest Actor kuma-11th African Emerging Filmmakers Awards abeseThe Station, eThekwini, muva nje.
UBhekisizwe (32) waseMzimkhulu uqumbe phansi emkhakheni womlingisi ovelele kwabesilisa oSihle Mzobe, Omega Mncube, Khethelo Mkhize noMfundo Nkabini.
Emuva kokukhala amuke nalo mklomelo, uBhekisizwe uthe kube yinjabulo ukubungazwa ngomsebenzi aqala ukuzifela ngawo kusukela esemncane.
Leli ciko, elisheba ukulingisa nokucula, laziwa kakhulu ngendawo kaCalvin Gumede kwiDurban Gen nekaPrince onguBen 10 kaMadlala kuZalo.
UBhekisizwe uqale ukwaziwa kule ndima elingisa indawo kaDaniel kwi-eKasi: Our Stories Season 5, ekaTebza kwiGenerations: The Legacy, ekaPipiliza kwiSidingo, ekaMix Dladla kwiSibaya, ekaJohnny Boy kwiSithembiso, ekaKhuzwayo eMoyeni, ekaNkanyiso kwiShreds and Dreams, ekaPostman kwiGold Diggers, ekaLebo kwiSokhulu and Partners nakweminye imidlalo yethelevishini.
Ebuzwa ukuthi iyiphi inselelo ahlangabezana nayo ngokulingisa indawo kaBen 10, wathi kwaphoqeleka ukuba ayocwaninga kabanzi ngale ndawo njengoba engakaze waboshwa noma wathandana nomuntu wesifazane omdala ngokweminyaka kunaye.
Mayelana nomculo, uBhekisizwe uthe abantu abalindele imicu eminingi, ngisho nawenze nenkakha yekwaito, uZola 7.