NAMHLANJE kulindeleke ukuthi abezindondo zamaSOUTH AFRICAN FILM & TELEVISION AWARDS (SAFTAs) bamemezele uhlu lwabaqokelwe lezi zindondo. Umculi wakuleli uKelly Khumalo useveze ukuthi uhlelo lwakhe luqokiwe. ILife With Kelly Khumalo S3 okuwuhlelo lweShowmax iqokelwe umunxa weBest Structured Soapie Reality Show kulandela ukuhlelwa nokudidiyelwa kahle.
Kuzokhumbuleka ukuthi lolu hlelo lukhuluma ngqo ngokwenzeka empilweni kaKelly kusukela ekhaya, emculweni nempilo yakhe yangasese. Lokhu kwenza lungene khaxa kule ndondo eqokelwe yona. UKelly ushayele ihlombe ithimba elihlanganisa loluhlelo ngokuhlukana kwemikhakha eliyenzayo okubalwa @thegoat.africa @bongapercy @tsotetsikl @makeupbyminkzz9 @stichxsmb @kuda_j kanjalo nabeShowmax.
" Ngibongela wonke umuntu obenesandla, ngibonge kwiShowmax nangethuba lokuzindlala ubunjalo bami emhlabeni jikelele," kubonga uKelly. Abantu bazithakasele kakhulu lezi zindaba baveza nokuthi uhlelo lwakhe lufanele ukuqokwa kulezi zindondo.Inhlokomo inkulu ezinkundleni zokuxhumana kubalandeli njengoba nemiyalezo embongelayo nethimba ilokhu ingene njalo kwikhasi lakhe lakwi-Instagram.
" Kwizinhlelo zethelevishini esengike ngazibuka, impela uhlelo lwakho luyiqiniso . Ngaphandle kokuchema ikufanele lena," kuncoma uMmakgotso Tines.
" Mkhaya ngiyakubongela sithandwa," kusho uYayarSA
" Kwathi angithi, wedeka itafula phambi kwezitha," kusho uSonto8704.
Ngaphandle kohlelo lukaKelly kusabhekwe nezinye nabamafilimu abazomenyezelwa abamaSAFTAs.
