UMPHAKATHI waseZinqoleni, eSouth Coast bewutheleke ngobuningi bawo kwindumezulu yomcimbi waminyaka yonke iNkosinathi Mcabangelwa Cele Tournament ezinkundleni zasoShabeni, KweSkandosi ngeSonto.
Amanye amalungu abuyele emakhaya izihlathi zivakashele izindlebe njengoba zihambe kulo mcimbi seziqiqinge izijumbana zokudla.
Kulo mcimbi bekudlalwa izinhlobonhlobo zemidlalo okubalwa kuyo ibhola lezinyawo nelomnqakiswano, i-volleyball, umjaho wejubane kanye nomdlalo womkhalambazo.
Izithameli zomcimbi azigcinanga ngokuzitika ngoncamnce nangezibiliboco nokwehlisa ngeziphuzo ezinhlobonhlobo kodwa zibuye zathakasela umculo ohlukahlukene.
Bezidansa zize zikhase phansi futhi zibuye zigide ingoma ngesikhathi sekunandisa abaculi abanjengeGcokama Elisha, Lvovo Derrango, DJ Tira, Duncan, DJ Bongz, Big Nuz, DJ Happy Gal, Mbeje, Kay Musiq, Amatycooler, Hero, DJ Slwane, 101, Bhuwa, Royal DJ nabanye. Uhlelo beluphethwe ngobuchule nguTap Tap.
Umgqugquzeli walo mcimbi, uNkosinathi Mcabangelwa Cele uthe nangonyaka ozayo uzoqhubeka nokujabulisa abantu bangakubo.