SEKUVELE ukuthi kushiya abalingisi asebezakhele igama emdlalweni Umkhokha: The Curse njengoba izolo kuqale isizini entsha yalo mdlalo.
Kubalingisi okuvela izindaba zokuthi bayahamba kuwona njengoba kuqala izinguquko, kubalwa uMbali Ngiba olingisa indawo kaZodwa noPinky Ntshangase obelingisa indawo kaMaZungu.
Isolezwe lihabule ngomthombo walo ukuthi laba bobabili bashiye kulo mdlalo njengoba kuqala isizini entsha futhi akukho okungale okubenze bashiya lo mdlalo.
“Izinguquko ziningi kulo mdlalo kule sizini entsha, abalingisi abaningi abafana noMbuso Khoza bashiyile kulo mdlalo ngesizini edlule, ngakho manje kuzoshiya nabanye njengoba lo mdlalo uqala isizini entsha. UHope Mbhele (Mabusi), kuke kwezwakala izindaba zokuthi angase ashiye kodwa futhi nawe uma uwubuka lo mdlalo ngathi uzofa kodwa konke lokho kuzoshintsha njengoba yena engayi ndawo. Abantu abahambayo abasatsheliwe okwamanje yilaba ababili,” kusho umthombo.
Uveze ukuthi okwamanje abukho ubuso obusha obusaqhamukile ukuzoqopha njengoba kusaqhutshwa nabakade bekhona.
“UMbali uzogcina ukubonakala kulo mdlalo kuyona le nyanga kanjalo noPinky angisazi kahle noma usazobonakala noma indawo yakhe isiphelile ngeke esabonakala,” kuchaza umthombo.
UPinky ubhale ekhasini lakhe enkundleni yokuxhumana i-Instagram nala avalelise khona kulo mdlalo.
Uthe konke okuhle akade ekwenza sekufinyelele emaphethelweni.
“Siyabonga kakhulu, sibonga asiphezi, sibonga izandla zidlula ikhanda ngokubukela Umkhokha: The Curse Season 1. Uthando lwenu, isineke senu, uxhaso lwenu, ubuqotho benu ngokuhlala njalo ngo-8.30 nibukele umdlalo, siyabonga. Ngaphandle kwenu asiyilutho, ozithobayo MAZUNGU Indlovukazi kaMaphalala”.
UPortia Hlongwane weMzansi Magic uziqinisekisile izindaba zokushiya kwalaba.
Uvezile ukuthi bazogcina ukubonakala kulo mdlalo kule nyanga.