SEKUVELE ukuthi bese kunesikhathi engaphilile omunye wabahleli bomcimbi wokholo amaCrown Gospel Awards, uSipho Kaleni (47), okuvele izindaba zokudlula kwakhe emhlabeni izolo ekuseni.
UKaleni waseSprings, ubejwayele ukubonakala eba noZanele LaMbokazi-Khambule uma sekwethulwa izindondo zokugcina ezibalulekile kulo mcimbi, ushonele esibhedlela iNetcare N17 eGoli.
Esikhuluma neSolezwe uZanele, bezilokhu zehle njalo izinyembezi waveza ukuthi usesikhumulweni sezindiza uyohlangana nomndeni kaSipho, eGoli.
"Bese sinethemba lokuthi uzolulama kodwa ke ukugula kwacaca ukuthi sekumdlile nakhu esedlulile emhlabeni. Kubuhlungu ngeke ngiqambe amanga. Ngisayohlangana nomndeni wakhe njengoba eshone namhlanje ekuseni, futhi siyabonga kubona bonke abaculi nawo wonke umuntu osesithintile ezwakalisa ukumangala kwakhe ngemuva kokuthi simemezele lezi zindaba,“ kusho uZanele.
USipho ubengagcini nje ngokuba yingxenye yalo mcimbi kuphela kodwa ubebuye acule, aphathe izinhlelo enze nokunye.
Abaculi okukhona kubo uMalusi Mbokazi noThinah Zungu bazwakalise ukwethuka kuvela lezi zindaba.