KUBIKWA ukuthi izovalwa ngumlingisi osemnkantshubovu uBaby Cele, indawo kaMaMzobe emdlalweni Umkhokha ngemva kwemibiko ethi uDeli Malinga, ushiye isigubhukane ngenxa yokuthi akaneme ngezinye izinto.
Isolezwe lithole ukuthi uDeli uzogcina ukuqopha ngenyanga ezayo kanti ukubonakala kuwo uyoze agcine ngasekupheleni konyaka.
Umthombo weSolezwe, ongaphakathi emdlalweni Umkhokha uveze ukuthi ekuqaleni kwaleli sonto uBaby ufake incwadi yokwesula emdlalweni Uzalo, njengoba ubeseshelwa aboMkhokha.
“UBaby ubone kungcono ukuthi ashiye kuZalo eze ngapha kuMkhokha. UDeli indaba yakhe kulo mdlalo igcine ingalungisekanga ngoba kuvela ukuthi kukhona izinto akade ezifuna kodwa zagcina zingalunganga. Wakhetha ukushiya kulo mdlalo ngoba engajabule. Kuke kwavela emithombeni yabezindaba ukuthi akajabule ngenxa yezinto azidingayo angazitholi, kuthiwa ukhala ngempatho yangaphakathi kuMkhokha kakhulu njengoba ethi imshiyisa lo mdlalo,” kusho umthombo.
Uveze ukuthi akucaci noma kuZalo indawo kaBaby izoqedwa noma izovalwa ngomunye.
UNomfundo Zondi weStained Glass uthe uyithumelile imibuzo ethimbeni eliqopha Uzalo, kodwa bebengakazitholi izimpendulo.
UPortia Hlongwane obhekelele umdlalo Umkhokha, kuMzansi Magic ugcine engayiphendulanga imibuzo abethunyelwe yona.
