IZINGANE zosaziwayo okukhona kubo u-Arthur Mafokate, DJ Tira, Ringo Madlingozi, Robbie Malinga (ongasekho) no-Azania Mosaka zizokhuluma ngendlela ezikhule ngayo njengoba zikhuliswa obaba nomama abangosaziwayo.
Lokhu kuzobonakala ohlelweni lwazo iBorn Into Fame ezoqala ukukhonjiswa kwiShowmax kusuka ngoJuni 18.
Kulo kuzobonakala u-AJ no-Owami Mafokate, nabo abasendimeni yomculo njengoba u-AJ enguphrojusa aphinde abe uDJ.
U-Owami yena uzogqamisa uhambo lwakhe emkhakheni wokuba uDJ asengene kuwo.
UPhila Madlingozi osezakhele igama emkhakheni wokulingisa uzogqamisa ubudlelwane bakhe noyise ukuthi buhamba kanjani, njengoba kwake kwavela ukuthi kukhona ukungezwani phakathi kwabo.
Indodana kaRobbie, uRobbie Malinga Jr ephinde yaziwe ngelikaRob Mally izakhele igama ezinkundleni zokuxhumana ngemuva kokugqamisa impilo ephezulu eyiphilayo.
Kulolu hlelo uzoqhubeka abonakale ezakhela udumo yize uyise engasekho.
UShamiso Mosaka oyindodakazi yokuqala yenkakha yomsakazo u-Azania Mosaka, uzokhuluma ngokuhamba ezinyathelweni zikanina nokungena endimeni yobumnandi.
Uzokhuluma ngokuba sezinhlelweni okukhona kuzo iVJing kuMTV Base Africa neMTV Africa’s Ghosted AF: Love Gone Missing.
Indodana kaTira, uJunior Khathi, oneminyaka engu 25 naye oseqalile ukuzakhela igama uzobonakala ohlelweni ephendla indlela yokungena emkhakheni wokuba umrepha njengoba ephinde abe nesifiso sokuba uphrojusa nomlingisi.
Inkampani eqopha lolu hlelo iGOAT Production esikhiqize izinhlelo okukhona kuzo i-Unfollowed, Life With Kelly Khumalo, neThe Real Housewives Ultimate Girls Trip - South Africa, iveze ukuthi kungumsebenzi wayo ukuvezela abantu izinhlobo ezehlukene zezinhlelo ukuze bahlale bejabule futhi bazi ukuthi kwenzekani empilweni yosaziwayo abahlukene.