SEKUQUBUKE indida ngokuhambela Eyadini Lounge kukaMax Mqadi weMax’s Lifestlye, eMlaza ngoLwesine.
Kube nenhlokomo ezinkundleni zokuxhumana ngesikhathi abaseYadini befaka isithombe sikaMax ehamba nomnikazi wale ndawo yobumnandi uJabulani “Mjay” Zama ebesihambisana nombhalo othi uMax ubevakashele Eyadini.
Kepha uMax uyaphika ukuthi uvakashele Eyadini, uthe ubehamba emgwaqweni noMjay behlola umgwaqo.
“Angazi ukuthi ubani oshuthe isithombe nokuthi inhloso yakhe bekuyini abhale ukuthi ngivakashele Eyadini? Angizange ngiye Eyadini, besihamba ngaphandle emgwaqweni njengoba kunohlelo lokunweba umgwaqo ogudla kwaMax naseYadini,” kusho uMax.
Uthe akakaze aye Eyadini kodwa mhlawumbe uzoya ngelinye ilanga.
Uqhube wathi akanendaba ngokusabalala kwalokhu kodwa uma abantu bembuza yena uzobatshela iqiniso.
UMjay uthe uMax ubehambele ngaphandle kwaseYadini ukuhlolwa indawo njengoba kunezinhlelo zokunwetshwa komgwaqo.
“Akazange angene ngaphakathi kodwa ume ngaphandle okuseyindawo yaseYadini. Besikhuluma ngalokho uma sithi uvakashele Eyadini, besingasho vele ukuthi ungene ngaphakathi wahlala. Yena bekumele asho uma engafuni ukushutha nami,” kusho uMjay.
Uqhube wathi uyaphazama uMax uma ethi akakaze alubhade Eyadini ngoba kuqala ubewasha imoto yakhe iMercedes Benz emnyama khona, abuye azilandele yona mathupha.
Ugcizelele ukuthi akamphoqi uMax ukuthi avakashele eYadini uma ebona engathi kuzomlulaza.