INHLANGANO yezokusakaza iSouth African Broadcasting Corporation (SABC), ngoLwesine ekuseni yethule inkundla entsha yokusakaza izinhlelo zayo ebizwa ngokuthi, yiSABC +, eSandton.
Inkundla yamahhala itholakala nangokufaka i-App yayo kwiselula kanti isakaza bukhoma iziteshi zeSABC, okubalwa okuyiSABC 1, SABC 2, SABC 3, SABC Sports neSABC News.
Ababukeli bazokwazi ukubukela izinhlelo ezibaphuthelile ngokuzibukela kwiCatch Up kanti neziteshi zemisakazo eziwu-19 ezingaphansi kwenhlangano ziyadlala nakhona.
Isikhulu esiphezulu senhlangano uMnuz Madoda Mxakwe, sithe leli gxathu lisho ukwembuleka kwekhasi elisha eSABC ngoba kwanda izinkundla zokuhlinzekela amakhasimende abo ngolwazi. Uthe kuyisisekelo sokuthi iSABC ikwazi ukuqhubeka nokungenisa imali ngomuso.
I-SABC yethula inkundla nje, phambilini ibineSABC News app lapho abantu bebekwazi ukubuka kuphela isiteshi sezindaba. Bebekwazi nokudlala imisakazo yayo.
Kule app entsha abantu bazokwazi nokubuka imidlalo yeNdebe yoMhlaba bukhoma eQatar.