UDJ waseThekwini, uMthokozisi ‘Tira’ Khathi, uthembisa lukhulu emdlalweni owuchungechunge okhonjiswa kwi-e.tv phakathi nezinsuku ngo-9 ebusuku, iSmoke & Mirrors. UDJ Tira uzobonakala namhlanje kulo mdlalo enza adume ngakho futhi elingisa.
Ebuzwa ukuthi uwuthole kanjani lo msebenzi, uDJ Tira uthe igama lakhe endimeni yezokungcebeleka selilikhulu kakhulu. "Ngakho abadidiyeli bemidlalo yethelevishini sebenakho ukulokhu bengibiza ukuba ngivele emidlalweni yabo. Kusukela kudala ngezikhathi zoBongo kwiFamily Bonds, bengilokhu ngivela nje. Ngingathi nje, kancane, kancane ngiyavela."
Akamusha kule ndima yokulingisa uDJ Tira njengoba ngo-2017 eke wadlala nezingwazi zaphesheya kwezilwandle, uDarrin Henson noCarl Anthony Payne, kwiMy Zulu Wedding. Ubuye walingisa nakwiMuvhango nakwenye ifilimu ebikhonjiswa kwiNetflix esihloko sithi Uthando Lwethu.
Mayelana nomculo, uDJ Tira uthe usanda kukhipha i-albhamu esihloko sithi, Malume Way.
"Ngisaqhubeka nokukhiqiza umculo ojabulisa abantu. Okumnandi ukuthi izinto azisafani nakuqala. Sekulula kabi ngoba izingoma sezivele ziphushwe kuma-downloads. Ngisanda kukhipha umucu othi Cela Sikhulume (awenze noLwah Ndlunkulu noXolwa) nethi Korobela (ebophele uSkills, Marumba Pitch namaQ.Twins)."
Uthe okumenza ahlale evelela minyaka yonke wukuthi udidiyela umculo okhuluma nabantu nothinta izinhliziyo zabo.