ULENGELWA yizembe umdlalo iMuvhango, okhonjiswa kuSABC 2 njalo ngoMsombuluko kuya kuLwesihlanu ngo-9 ebusuku ngemuva kokunciphiswa kwezinsuku obonakala ngazo.
Lolu shintsho luvezwe ngabeSABC esitatimendeni esiveze ukuthi manje usuzokhonjiswa kusukela ngoMsombuluko kuya kuLwesithathu.
Ushintsho luzoqala ngo- Agasti kuwo lo nyaka ngokusho kwesitatimende esithunyelelwe abezindaba.
Omunye umdlalo oncishiselwe izinsuku kulesi siteshi yi-7 de Laan, nayo esizodlala izinsuku ezintathu kuphela.
Ushintsho lwalo mdlalo luzoqala ngo- Ephreli 5 kulo nyaka.
ISABC iphinde yaveza ukuthi kuzoba nemidlalo emisha ezobonakala maduze kuSABC2.
Umphathi weSABC uMnuz Merlin Naicker uthe,:" Ngokwandisa imidlalo emisha sihlose ukunyusa izinga lezinhlelo ezikhonjiswa kulesi siteshi zibe seqophelweni eliphezulu kubabukeli. Kumqoka ukuthi sibe nezinhlelo ezizophinde zingenise imali ezingeke zigcine nje ngokwandisa isibalo sababukeli kuphela."
ISABC iqhamuka nalezi zinhlelo nje, kuke kwaba namahlebezi okuthi kunemidlalo ehlela ukuyiqeda ngenxa yokungangenisi nzuzo.