UMAKADEBONA owamemezela ukuthi usethi khumu ekubeni wumsakazi, uMakhosi Khoza, ushaye ungqimphothwe esinqumweni sakhe njengoba eqale ukwethula uhlelo lwantambama esiteshini iMegazone Radio App izolo ntambama
UMakhosi wethula uhlelo i-After school is after school noZaba "KweenZaba" Simbine wodumo lokusakaza kwi-East Coast Radio.
Isiteshi abasakaza kuso sisakaza online (nge-internet) nakwi-app efakwa kumaselula futhi istudiyo sabo siseMhlanga, ngaseGateway.
UMakhosi, oke wasakaza eziteshini okubalwa kuzo i-East Coast Radio, Rise FM, Vuma FM nezinye, ugcine emsakazweni ngo-2022 kwiGagasi FM, lapho ayeyi-content specialist esebenza eduze nabasakazi.
"Ngayeka ukusakaza ngo-2019 ngoba ngangicabanga ukuthi akusekho engingakwenza kodwa manje u-2024, sekubukeka ngathi kumele ngivume ukuthi ngaphaphalaza, ngenze kabusha ngoba uthando selungigabhile futhi," kusho uMakhosi.
UZaba uke wasebenza nasohlelweni lwethelevishini i-Hectic Nine 9 kwiSABC 2. Uthe uyakujabulela ukuvula leli khasi elisha kwezokusakaza.
"Sengazane noMakhosi iminyaka engaphezulu kweyishumi futhi asikaze sithole ithuba lokusebenza ndawonye emoyeni ngakho lokhu kuzoba mnandi kakhulu," kusho uZaba.