UKHOZI FM luhlabane ngesibabuli somlingisi wemidlalo yethelevishini uSbongimpilo ‘Pepi’ Ngobe. USbongimpilo uqale ukuduma ngokudlala indawo kaNtombi emdlalweni weNetflix ithi The Letter Reader, nekaVakashile omncane kwiZulu noMhlaba (Mzansi Magic).
Emdlalweni wantambama osakazwa Ukhozi FM, osihloko sithi Isinqumo, uSbongimpilo ulingisa indawo yowesifazane ongu-Olwethu, oshade nendoda endala emhlukumezayo futhi engafuni abe nabangani noma asebenze yize eyisifundiswa. Uthe akuthakasela kakhulu ngale ndawo ukuthi iyamkhulisa endimeni yokulingisa futhi imphonsela inselelo yokuba ahlale ephakamisa amasokisi.
"U-Olwethu uhluke ngezindlela eziningi kuSbongimpilo ngoba uyiqhalaqhala, uyaphendula futhi unenkani. Mhlawumbe uSbongi unenkani lapha, nalaphaya kodwa u-Olwethu akazwani nokutshelwa. Uyintombazane ezazi ukuthi ifundile," kuchaza uSbongimpilo, ngomlingiswa owudlalayo.
Phambilini ubelingisa indawo kaMinenhle kwiDurban Gen futhi uke wadlala kwiForbidden Love, Uzalo, Uselwa, Comatose, The Will nakwiJersey Number Ten.
USbongimpilo uthe esinye isifundo asithola emdlalweni ngesokuthi bakhona abesifazane abahlukumezeka buthule, emizini yabo. Kungenzeka ukuthi abafuni ukuphumela obala ngenxa yokwesaba abayeni babo noma ukulahlekelwa yimpilo yokuhlala emizini esesilungwini nezimoto zikanokusho.
"Le ndawo engiyidlalayo iyangivova futhi ingenza nginganethezeki nakancane ngoba kufanele abalaleli ngibanikeze lokhu okufanele bakuzwe."
USbongimpilo uthe akangenanga kulo mkhakha ngoba eshade nomsakazi woKhozi FM, uKhathide "Tshatha" Ngobe. Ngokusho kwakhe uqhutshwa wuthando lokulingisa olwaqala ukusha amalangabi esemncane. "Bengihlale ngibuka ithelevishini kakhulu. Bekuthi uma ngibuka amafilimu ane ’action’, ngizibone ngingayenza leyo nto. Lakhula lolu thando ngaphakathi kimi,“ kuchaza uSbongi, ngohambo lwakhe kwezokulingisa.
Nakuba ayekulubalubela ukulingisa kodwa wayenenkinga yokuthi emakhaya umkhakha wokulingisa usathathwa njengento yokuchitha isizungu hhayi umsebenzi. Uthe lokho kwenza ukuthi uma eqeda isikole eHarvest High, eMnambithi, wayokwenza izifundo ze-Accounting eDurban University of Technology.
Eseziphothulile usebenze unyaka owodwa maqede wawulaxaza phansi umsebenzi, walandela ubizo lwakhe. Uthe ukhule ebukela kwizingwazi zabalingisi ezinjengoViola Davis, owaduma ngokuba ngu-Annelise Keating no-Angelina Jolie. USbongimpilo uthe uzibona eminyakeni eyishumi ezayo esenguphrojusa nombhali wamafilimu nemidlalo futhi esenenkampani yakhe eqhakambisa isibongo sakubo.