UPHUME ngebheyili ka-R5 000 izolo eNkantolo yeMantshi yaseProtea umelaphi wendabuko uMakhotso Mofokeng odume ngelikaGogo Maweni obhekene necala lokushaya ngenhloso yokulimaza.
UGogo Maweni (39) bese echithe isonto ezitokisini ngemuva kokuboshwa ngempelasonto eyedlule. Wavela enkantolo ngeledlule kodwa icala lakhe lahlehliselwa izolo ngenhloso yokucela ibheyili.
UMbuso uveze ukuthi ngo-2009 watholwa enecala lokushayela ephuzile, ngo-2017 elokushaya ngenhloso yokulimaza, ngo-2018 amabili okukhwabanisa nokweba okuyinto angayivezanga. Ngenxa yalokho uzothweswa elinye icala lokukhipha imininingwane okungesiyo ngesikhathi ecela ibheyili.
Phakathi kwamanye amaphuzu awabekile encenga inkantolo ukuthi imdedele uthe ukhulelwe amawele futhi unezingane ezincane ezintathu ezingaxhumani noyise namabhizinisi akhe azovalwa uma engakhishwa. Uthe ngeke axhumane nofakazi futhi ngoba icala lidala uphenyo kumele kube ngabe seluphelile.
Inkantolo imnike ibheyili ka-R5 000 icala lahlehliselwa uFebhuwari 11.