UVULELWE icala lokushaya umqeqeshi weMamelodi Sundowns, uPitso Mosimane, ngemuva kokuhilizisana nonogada kade kunomdlalo we-Absa Premiership phakathi kwaMaZulu FC neqembu lakhe eKing Zwelithini Stadium, eMlaza ngempelasonto.
Izindaba zivezwe okhulumela AmaZulu FC, uBrilliant Mkhathini, ngoMsiombuluko emini.
“Unogada uNathi Ngwenya weNgwelela Protection Services, okuyinkampani yabaqaphi esebenzisana naMaZulu, ulivulile icala. Uveze ukuthi umqeqeshi umbeke isandla ngesikhathi kunesixakaxaka ngemuva komdlalo,” kusho uMkhathini.
Okhulumela amaphoyisa KwaZulu-Natal, Lt-Colonel uThulani Zwane uqinisekisile ukuthi kunecala elivuliwe.
“Kuvulwe icala lokushaya esiteshini saseMlaza. Akekho osaboshiwe njengoba kusaqhubeka uphenyo,” kusho uLt-Colonel Zwane.
Ngokwemibiko, uPitso uphume enkundleni eseqashwe amaphoyisa ngemuva kwalo mdlalo ophele ngo 3-3.
IMamelodi Sundowns ibingakaphawuli ngalolu daba.