UMQEQESHI kaSivenathi " Special One" Nontshinga, uthe bakuqonda kahle ukuthi kulele ezandleni zabo ukubuyisa isithunzi sesibhakela kuleli.
UColin Nathan naleli bhokisa bafulathele izwe ngeSonto eledlule, belubhekisa e-Oaxaca eMexico, ukuyozama ukulanda ibhande le-IBF World Light Flyweight ku-Andrian "Gatito" Curiel wakhona kuleliya lizwe.
Impi yala mabhokisa iqhathwe yiMatchroom Sports yezelamani zakwaHearn, uBarry no-Eddie Hearn ezase-United Kingdom (UK).
Abantu bakuleli bazokwazi ukuyithamela ezintatha, ngoMgqibelo.
UNontshinga uphinde wahamba noyise, uThembani "The Best" Gopheni noBenny Pelman abazolekelela ekhoneni.
UNathan, ekhuluma naleli phephandaba eseMexico, uthe ujabule ngendlela eyisimanga ngendlela amalungiselo empi ahambe ngayo.
"Okubalulekile wukuthi uSivenathi ufundile emaphutheni empi edlule. Ekhempini yamasonto ayisithupha, ufunde okuningi kuhlanganisa nokungcweka namabhokisa ezinga eliphezulu," kubeka uNathan otuse abantu baseMexico ngokubamukela ngezandla ezifudumele.
UNontshinga waseChicken Farm, e-East London, e-Eastern Cape, uphucwe nguCuriel i-IBF ngoNovemba 2 nyakenye eMonaco.
Ushaywe ngomngqimuzo womlalisa phansi emzuliswaneni wesibili. Lesi sicoco ubesithathe kuHector Flores Calixton wakhona eMexico.
Impi yabo yanqoba indondo yeFight of the Year kuma-International Boxing Federation Awards ngo-2022. Leli bhande uliphucwe esalivikele kanye kuRegie Suganob wasePhilippine.
Ukushaywa kukaNontshinga ngoNovemba wanyakenye kusho ukuthi elakuleli kalisenaye ophethe elinye lamabhande amane ahlonishwa wumhlaba wonke. Lezi zicoco yi-WBC, WBA, IBF ne-WBO.
Kwabakuleli abagcine ukuwaphatha nguZolan "Last Born" Tete obeyingqwele ye-WBO World noMoruti " Babyface" Mthalane obengumpetha we-IBF World. UNathan uthembise ukuthi bazokwenza konke ukugqiba ihlazo.
"Sikwazi kahle ukuthi akukuhle ukuthi izwe elifana neNingizimu Afrika lingabi nelilodwa ibhokisa eliphethe esinye salezi zicoco. Sizozama ngakho konke ukuqeda leli hlazo".
UNontshinga usanqobe izimpi eziwu-12, wahlulwa kweyodwa. UCuriel usanqobe eziwu-24, wahlulwa kwezine, walwa ngokulingana kweyodwa.