AWUKHO umbandela obekelwe umqeqeshi, uManqoba “TV” Mngqithi, kwiLamontville Golden Arrows osanda kukhuza ibuya kuleli qembu laseThekwini ngenxa yobudlelwano bakhe nosihlalo walo, uMato Madlala.
UMngqithi owazakhela igama nge-Arrows ekuqeqesheni, usanda kubuyela kuyona ngemuva kweminyaka engaphezulu kwengu-10 esebenza ngaphansi kwabaqeqeshi abahlukene kwiMamelodi Sundowns.
NgoDisemba, uMngqithi ukhululiwe ekuqeqesheni iSundowns, indawo yakhe yathathwa nguMiguel Cardoso. Kusukela exoshwe kwiSundowns, uMngqithi uchayise amaqembu amaningi athathwa njengamakhulu abefuna ukumqasha ngokusho kwakhe.
Akuzange kumangaze nokho ukuqhamuka kwakhe kwi-Arrows okuyiqembu agqama ngalo ebholeni elikhokhelayo eNingizimu Afrika, elisiza lidla isicoco salo okuseyisona sodwa seMTN 8 ngo-2009.
Kusukela ebuyile, usenqobe kwiPolokwane City, wabamba iSundowns ngo 1-1, ngaphambi kokuguqiswa yiMagesi FC ngo 1-0 kowakamuva kwiBetway Premiership.
Ngesikhathi ekhuluma nabezindaba abenesithangami nabo muva nje uMngqithi ubuziwe ngombandela abekelwe wona kwazise ufike kwi-Arrows idlalela ngasemsileni we-log.
Okuqapheleke empendulweni yakhe wukuthi ubudlelwano obuphakathi kwakhe nosihlalo weqembu buqine ngale ndlela yokuthi akukho abamdwebela khona bathi bafuna akwenze ingakapheli isizini.
“Ebholeni laseNingizimu Afrika angikholwa ukuthi kukhona umuntu ongiqonda kumbe ongazi ngendlela uSis Mato (Madlala) angazi ngayo,” kusho uMngqithi.
“Abangazi bangazitshela ukuthi siyalamana ngendlela esisondelene ngayo. Uma nginaye angizizwa sengathi nginomuntu ongiqashile kanti nangesikhathi ngisasebenza kwiSundowns bengisiza noma ingayiphi indlela kwi-Arrows uma kudingeka.
“Iqiniso wukuthi awukho umbandela engibekelwe wona ngaphandle kokuqinisekisa ukuthi uMato ulala ubuthongo ebusuku ngaphandle kokuxakwa yindawo okuhleli kuyona iqembu kwi-log.
“Kumqoka ukuthi i-Arrows ibengcono ngaphansi kwesandla sami kunalokhu engiyifice iyikhona.
“Okusizayo wukuthi nomsebenzi wabaqeqeshi engibaficile (Musa Bilankulu noKagisho Dikgacoi) angiwuxwayi kwazise bengivele ngazi ngawo,” kusho uMngqithi.
Abafana Bes’thende bazobuyela enkundleni ngokwamukela iKaizer Chiefs emdlalweni weligi ngoMashi 30 eMpumalanga Stadium, eHammarsdale.