SuperSport United (1)1
Kaizer Chiefs (0)0
Injabulo yabalandeli beKaizer Chiefs ishabalale okwamazolo ebona ilanga yehlulwa yiSuperSport United emdlalweni weBetway Premiership eNew Peter Mokaba Stadium, ePolokwane, ngoMgqibelo ntambama.
Igoli leSuperSport lishaywe nguTashreeq Morris esiwombeni sokuqala.
Amakhosi angene enkundleni eshayela phezulu, kubhekwe ukuthi azophinde azidlele amahlanga kwiSuperSport ayithele ngehlazo lika 4-0 koweCarling Knockout khona eLimpopo ngesonto eledlule.
Kuqale umdlalo umqeqeshi weSuperSport, uGavin Hunt, esebalise ngabadlali abangekho esikimini sakhe ngenxa yokulimala. Kulaba badlali kukhona unozinti, uRicardo Goss, olimale ejimini. Ngokusho kukaHunt baphoqeke ukuthi balande isigubhukane unozinti osemncane, uSamkelo Xulu, ukuze ezoba sebhentshini, kuvimbe uThakasani Mbanjwa. Omunye olimele nguTerrence Dzvukamanja owayekhona bebhudluzwa yiChiefs ngempelasonto edlule.
IChiefs isheshe yazinza emdlalweni, idlala ibhola ngokukhululeka kodwa kungekho okwethusa uMbanjwa ezintini. Empeleni esiwombeni sokuqala lo nozinti obedlalela iMoroka Swallows ngesizini edlule, uvimbe ibhola elillodwa kuphela ebelingagcwele ebelishaywe nguWandile Duba ngomzuzu ka-34. Ngakolunye uhlangothi, iSuperSport ibikhombisa ukuba yingozi uma ihlasela kodwa udonga lwasemuva leChiefs belukwazi ukumelana nayo. Sekusele amanenjana kuyiphe ekhefini, uMorris uqobele phakathi ibhola ebeligotshwe nguSiphesihle Ndlovu kwesokudla ngomzuzu ka-44.
Esiwombeni sesibili, iChiefs ibuye yaqhubeka nokuphatha umdlalo. Nokho ibuhluleka ukwakha amathuba acacile okushaya amagoli. Ngokuhamba kwesikhathi umqeqeshi weChiefs, uNasreddine Nabi, usikhiphile isethenjwa uGaston Sirino, esingabanga nomdlalo omuhle. Endaweni kaSirino kungene uMfundo Vilakazi ofike wayishukumisa iChiefs. Nokho udonga lwasemuva lweSuperSport belungasafuni lutho. Ngomzuzu ka-88, uMbanjwa uchithele ngaphandle ishodi likaVilakazi. Ekupheleni komdlalo, ukungenami bekubhalwe emehlweni kubalandeli baMakhosi osekuneminyaka agcina ukuwina indebe.
IChiefs, esihlulwe kabili emidlalweni emibili ilandelana kwiligi kule sizini, izobuyela enkundleni ngoLwesithathu isivakashele iMagesi khona ePeter Mokaba Stadium. ISuperSport izovakashela iLamontville Golden Arrows eMpumalanga Stadium, eHammarsdale, ngoLwesithathu ebusuku.