XOLILE MPISANE
SIYANDA esikhundleni sokuthi sehle isibalo semidlalo yesigaba esiphezulu sePremier Soccer League (PSL) ehlehlisiwe ngenxa yezizathu ezahlukene.
Isizini yebhola lakuleli ayihambi ngendlela ejwayelekile kulandela izingqinamba abahleli beligi asebebhekane nazo eziphazamise izinhlelo zemidlalo yeligi neyomkhumulajezi.
Lezi zinselelo ziqale ngesikhathi iPSL imemezela ngoFebhuwari ukuthi izomiswa yonke imidlalo ebandakanya iRoyal AM ngenxa yokuhluleka kwaleli qembu ukuqinisekisa ukuthi lizokwazi ukubhekana nezindleko zokusingatha nokuya emidlalweni.
IThwihli Thwahla igcine ukungena enkundleni ngoDisemba nyakenye. Kulo nyaka sekuhlehliswe imidlalo yeligi engu-11 obekumele iyidlale namaqembu ahlukene.
Umdlalo we-Last 32 weNedbank Cup okwakufanele iwudlale neMilford FC wagcina ungadlalwanga, kwadluliswa iMilford.
Njengoba leli qembu likaShauwn 'MaMkhize" Mkhize lizodayiswa yiSARS ngoLwesihlanu, akukacaci ukuthi lizoqhubeka nini nemidlalo yalo ngaphansi kwabaphathi abasha.
Ngaphandle kwale midlalo ye-AM, mithathu eminye ehlanganisa amanye amaqembu esihlehlisiwe, okusalindwe ukuthi iPSL imemezele ukuthi izodlalwa nini.
Owokuqala oweligi ophakathi kweLamontville Golden Arrows ne-Orlando Pirates ogcine ungaqalanga eMpumalanga Stadium, eHammarsdale, ngoFebhuwari 19, ngenxa yamanzi ayegcwele inkundla.
Kudlule izinsukwana, kwahlehliswa obuphakathi kweSuperSport United ne- Arrows, eLucas Moripe Stadium, e-Atteridgeville, ngoFebhuwari 23 ngenxa yokucisha kukagesi.
Le nkundla iphinde yaba sematheni ngempelasonto ngesikhathi kuhlehliswa umdlalo wama-quarterfinal phakathi kweMamelodi Sundowns neSekhukhune United obekufanele udlalelwe kuyona.
Ngokwesitatimende esikhishwe yiPSL ngoLwesihlanu ebusuku, lesi sinqumo sithathwe ngenxa yokuthi le nkundla ibizosingatha omunye umdlalo ngosuku olufanayo.
Lo mdlalo omunye bekungowokuhlungela iNdebe yoMhlaba phakathi kweqembu lesizwe lakuleli lamantombazane lika-Under-17 neNigeria oqale ngo-3 ntambama.
Nakuba oweNedbank ubuzoqala ngo-8 ebusuku kodwa besingeke sibe khona isikhathi esanele phakathi kwale midlalo ukuqinisekisa ukuthi kwenziwe konke okudingekayo uma kuzodlalwa umdlalo waleli zinga.
Kufanele ukuthi zonke lezi zinxushunxushu zibashiye benwaya amakhanda o abahlela imidlalo yePSL njengoba sanda isibalo sengadlaliwe ekubeni izinsuku zincipha.
Kwenzeka lokhu nje, iPirates neSundowns, ababanga isicoco seligi, basekhona kwiNedbank Cup futhi sebezoqala ama-quarterfinal eCaf Champions League maduze nje.
Ukuminyana kwemidlalo yasekhaya kungagcina kuwehlisile amathuba ala maqembu okuletha indebe yeChampions League kuleli okokuqala kusukela ngo-2016.