KUNGATHI kuqambe kushaya isikhathi sokuvalwa kukashwele wokuhwebelana ngabadlali, uDaniel Akpeyi, esengunozinti weSwallows.
Lo nozinti wazakhela igama kwiKaizer Chiefs, phakathi kwesizini ka-2018-19 neka-2021-22 ngaphansi komqeqeshi u-Ernst Middendorp.
Selokhu iChiefs imkhombe indlela unozinti ozalelwe eNigeria, ngesizini edlule, usephenduke umantunta nendishi nomntshingo ubethwa ngubani. Uke wazama inhlanhla kwiChippa United, ake wayidlale ngaphambi kokujoyina AmaKhosi. Kepha nakhona izinto kazihambanga kahle njengoba esezilolonga neSwallows.
Uke wakhonjwa nakwiMaritzburg United, kodwa washaywa wukuthi besesanele isibalo sabadlali abangewona umsinsi wokuzimilela eNingizimu Afrika. Selukho echithwe yilawa maqembu ubejima neSwallows. Nokho ubengayitholi inkontileka ngenxa yesigwebo seFifa esiyivimba ukusayinisa abadlali kuze kube u-2024.
IFifa igixabeze iSwallows isigwebo ngasekupheleni konyaka odlule, iyisola ngokukweleta uVladimir Mandic, no-Obren Cuckovic, baseSerbia, isamba semali.
Ubuholi obusha beZinyoni buzithola bukule nkinga nje, ukukweletwa kwabadlali kwenzeka iqembu lisaphethwe nguLeon Prins. Abadlali babegijima kulo ngo-2014-15 okuyisizini eladliwa izembe ngayo. Ngo-2016, uPrince waqoma ukulifaka endalini engabakhokhelanga imali yabo.
Icala likaDavid Mogashoa, ongusihlalo weSwallows, nayebambisene nabo kwaba ukuthenga isitifiketi seqembu ngo-2018-2019 esase sidayiselwe iMaccabi FC. Isikhulu sikhale ngaphansi kwiFifa noma sesichaza ukuthi iSwallows ayihlanganise lutho neMoroka Swallows kaPrince. Iphephandaba lithole ukuthi izikhulu zeSwallows sezisikhokhile isikweletu sabadlali.
Kuthiwa ngoLwesibili, uMogashoa ubehlangene nabadlali ebazisa ukuthi seyixazululiwe inkinga ebiphakathi kwabo neFifa. Umthombo uthe uMogashoa ubatshele ukuthi sebelinde incwadi yeFifa ezobakhulula ukusayinisa abadlali lingakavalwa iwindi ngoLwesibili.
Uqhube wathi ngemuva komhlangano izikhulu zeqembu zibe nenguyazana nabadlali abebejima neSwallows efuna ukubasayinisa. Omunye wabo ngu-Akpeyi.
"Izinsuku zenjabulo kwiSwallows zibuyile. Sekuthandazelwa ukuthi iFifa iyithumele ungakashayi uLwesibili incwadi eyikhulula ukuthi isayinise abadlali. U-Akpeyi uhleka yedwa njengoba izikhulu zimyalele ukuthi alethe i-agent yakhe ukuze kuzoqalwa izingxoxo ngokushesha. Izikhulu zimtshele ukuthi zimphendlelile isikhala ngoba bese senele isibalo sabangaphandle.
“Uma konke kuhamba kahle umdlalweni wangesonto elizayo noRichards Bay esesayinile," kubeka umthombo.
Kuthintwa uMogashoa uthe akufihliwe ukuthi ingxabano yabo neFifa seyixazululiwe.
"Angikucacise ukuthi ngamanga ukuthi kunemali esiyikhokhile kwiFifa. Lolu daba siluxazulule ngaphandle kwayo. Luphume nobomvu kithina ngoba sesizosayinisa abadlali," kubeka uMogashoa.
Ebuzwa ngo-Akpeyi, uthe:" Nalapho kuyiqiniso elingeke liphikwe ukuthi kunabadlali ebesijima nabo nabanye esizobasayinisa. Ngeke ngikwazi ukudalula amagama abo".