I-ORLANDO Pirates iphinde yazenzela phansi ibanjwa yiStellenbosch FC ngo 0-0 emdlalweni weBetway Premiership okuwumphumela okhulula iMamelodi Sundowns esicongweni se-log.
Ukuyeka ithuba kwePirates, kuxegisela iSundowns ngamaphuzu angu-18 kwi-log kulandela ukunqoba kwayo ngo 2-0 kuMaZulu FC izolo ebusuku.
Isimbambamba sika 4-1 koweligi emdlalweni womzuliswano wokuqala kufanele wenze iPirates ukuthi ifike ifuthelana uma la maqembu esebhekene kowamagqubu ngeSonto ngo-3 ntambama, e-FNB Stadium, eNasrec.
Ukunethezeka kweSundowns esicongweni kuqinisekiswe ngamagoli ashaywe nguPeter Shalulile no-Arthur Sales ngokwahlukana kweziwombe kulo mdlalo obuseLucas Moripe Stadium, ePitoli.
Womabili la maqembu okuyiwona abukeka esembangweni wesicoco seligi yize kunenkebenkebe yegebe phakathi kwawo, aqale imidlalo yayizolo ekuqonda kahle ukuthi uphawini wokuqhuzuka awanawo.
Imbangela yalokhu wukuthi iPirates beyazi ukuthi izobhekana neSundowns ngeSonto nje, isele ngemidlalo emine kuyona kungenza umehluko ukuzishayela kubafana baseChroorkop.
Lo mqondo kufanele ukuba ubusa nakwezabeSundowns izingqondo kwazise ifike emdlalweni isuka ekulahleni amaphuzu kwiLamontville Golden Arrows ngeledlule.
Nezikimu eziqale umdlalo zikukhombisile lokhu ngoba bonke abadlali beSundowns abebesengcupheni yokweqiwa owangeSonto ngenxa yamakhadi, abazange bawuqale umdlalo.
NakwesePirates isikimu kuqapheleke okufanayo kwazise bekushintshwe abadlali abahlanu kwesiqale oweSuperSport United weNedbank Cup ngempelasonto edlule.
Njengoba bekulindelekile, iSundowns yakhe inqwaba yamathuba esiwombeni sokuqala kodwa yahluleka ukuwasebenzisa obekungasho nokho ukuthi AmaZulu abengafiki kuRonwen Williams obebuyile ezintini zeSundowns.
Yize iStellies ishodiswe ukukhishwa ngekhadi elibomvu esiwombeni sokuqala kukaBrian Onyango obesolwa ngokudlalisa kabi uTshegofatso Mabasa kodwa nase-Athlone kuyiwe ekhefini kuseyiqanda nhlangothi zombili.
Zisanda kubuya ekhefini uShalulile ubeke iSundowns ebuhleni kodwa zabuye zabambana kwazise Usuthu belulwa ngaphambi kokuqedwa amandla igoli likaSales.
Nakuba iPirates isalele ngemidlalo kodwa ukuhluleka kwayo ukubhobosa iStellenbosch esiwombeni sesibili, kufanele ukuba kuyithene amandla.