UMQEQESHI weLamontville Golden Arrows, uManqoba Mngqithi, usephumele obala ngokuthi uzomfongqela isigqoko kumqeqeshi weBafana Bafana umdlali wakhe wasesiswini, uVelemseni “Boyzie” Ndwandwe, akholwa wukuthi kumfanele ukuba seqenjini lesizwe.
UMngqithi ubekhuluma nabezindaba ngemuva kokuba ezakhe ziguqise iKaizer Chiefs ngo 2-1 emdlalweni weBetway Premiership eMoses Mabhida Stadium, eThekwini, ngoMgqibelo.
,Uze wathembisa nokuthi uzokhuluma nomqeqeshi weBafana, uHugo Broos ukuthi ake ambhekisise uNdwandwe.
UNdwandwe (29) waseMpangeni, ngomunye wabadlali abagqame ezinhlakeni zeGolden Arrows esesuka kwiKZN Academy. Wakhushulelwa esikimini esikhulu ngesizini ka-2016/2017.
Kule sizini usedlale imidlalo engu-18, washaya igoli elilodwa kuyona yonke imiqhudelwano.
UMgqithi uthe uzokhuluma nomqeqeshi weBafana, uHugo Broos, ukuthi amubheke uNdwandwe.
“Ngimbona engumdlali osezingeni eliphezulu. Ngokwezinga akulo ngicabanga ukuthi angadlala kunoma yiliphi iqembu (kwiPremiership). Akukhona ukuthi ngimbona manje ngoba sengiqeqesha i-Arrows, kudala ngaqala ukumbona.
Uma ungambuza, uzokutshela naye ukuthi singakanani isikhathi ngifisa ukusebenza naye eqenjini elilodwa, kodwa kwesinye isikhathi izinto azenzeki ngendlela ofuna ngayo,” kusho uMngqithi.
“Ngikholwa wukuthi kumfanele ukudlala eqenjini lesizwe futhi ngizozama ngakho konke okusemandleni ukukhuluma noHugo ukuthi ake ambheke. Unamandla ekumakeni, unamandla kakhulu futhi nasekuhlaseleni uma sekuyiwa phambili. Ungumdlali okhaliphe kakhulu.
Uyakwazi nokudlala ezindaweni ezehlukene, afike angene khaxa. Ngimsebenzise ezindaweni ezehlukene emidlalweni yakamuva esiyidlalile. Ngesikhathi sidlala neSundowns ngimnike umsebenzi wokugada uRibeiro (Lucas), nangenkathi sidlala nePolokwanengamnika owokugada u-Appollis, wenza le nto engangiyifuna.”
UMngqithi osanda kukhuza ibuya kuBafana Bes’thende esuka kwiMamelodi Sundowns, emidlalweni emine iqembu lakhe selinqobe emibili, ladlala ngokulingana kowodwa lashaywa komunye.
Kubhekwe amava alo mqeqeshi ekusizeni leli qembu laKwaZulu-Natal lizibekisele indawo kwiMTN8 okuyinto elayigcina ngesizini ka-2020/21.
Abafana Bes’thende bazobuyela ensimini ngomunye umdlalo wasekhaya abazowudlala neChippa United, eMpumalanga Stadium, eHammarsdale, ngoMgqibelo ngo-3 ntambama.