UMDLALI weDurban City, uSamkeko Maseko, ubona sekusele kubona bengabadlali ukuthi bakhiphe konke abanakho ukuze bawine isicoco seligi yeMotsepe Foundation Championship.
ICity ebuye namaphuzu amathathu iguqisa i-Upington City ngo 1-0 ngoLwesihlanu eChatsworth Stadium, eThekwini, iqhubekile nokuzisondeza ethubeni lokwenyukela kwiBetway Premiership.
Ukwehluleka ukubuya namaphuzu agcwele kwezimbangi zayo iKruger United ne-JDR Stars, kunike iCity elinye ithuba lokuvula igebe esicongweni se-log.
IKruger ibambane ngo 1-1 neCape Town Spurs ngoMgqibelo, i-JDR yabambana ngo 2-2 neMilford FC.
ICity esiqhwakele ngamaphuzu angu-45, ilandelwa yiKruger ne-JDR ngangu-37. Ngokwezibalo, iCity isidinga ukunqoba imidlalo emithathu kweyisikhombisa esele, ikhale yemuke nesicoco seChampionship.
“Bekumele nakanjani siwuwine umdlalo wethu ne-Upington njengoba bese sidlale ngokulingana kwemibili ilandelana, ngakho ukuwina kwethu kuyisusile ingcindezi ebese siqala ukuyizwa ngokwehluleka ukubuya namaphuzu esiwadingayo.
Ukuba moya munye nokwesekana esinakho njengabadlali leqenjini ngikholwa wukuthi yikho okuyikhambi elikhulu lokwenza kahle kwethu,” kusho uMaseko, odabuka eSweetwaters, eMgungundlovu.
“Sekuseduze phambili manje, wonke umuntu oyingxenye yeqembu uyawuzwa lowo muzwa.
Kodwa manje konke sekusele kithina njengabadlali ukuthi kule midlalo esele sikhiphe wonke amangwevu, silwele ukufa nokuphila ukuze sigcine siyiphakamisile indebe yeMotsepe Championship.”
UMaseko (22) omandla ngomjko oya phambili nokugoba amabhola ayingozi, yisizini yakhe yokuqala le esigabeni esikhokhelayo. Ujoyine iCity ngaphambi kokuqala kwesizini esuka kuMkhumbane FC kwiSafa KwaZulu-Natal ABC Motsepe League.
Emidlalweni engu-20, useshaye amagoli ayisikhombisa. Ulandela uzakwabo uJoslin Kamatuka osehlohle angu-11.
UMasekho ukuqonda kahle ukuthi ukukhuphukelwa kwePremiership kweqembu lakhe kungamvulela amathuba amaningi, ikakhulukazi njengoba esavunywa yiminyaka.
“Kuyisifiso sami esikhulu ukuzibona ngidlala kwiBetway Premiership, ngakho nami nozakwethu sisebenzela kona ukufaka iqembu kulesi sigaba esifiswa yiwo wonke umdlali webhola ukudlala kuso.”
ICity izodlala ne-University of Pretoria ekuhambeni ngoMgqibelo ngo-3 ntambama, eTuks Stadium, ePitoli.
Imidlalo yeMotsepe Foundation Championship
Durban City 1-0 Upington; Casric Stars 2-2 Leruma United; Black Leopards 2-2 Baroka; JDR Stars 2-2 Milford; Hungry Lions 0-1 University of Pretoria; Cape Town Spurs 1-1 Kruger United; Orbit College 0-1 Highbury; Pretoria Callies v Venda FC