UGLENROSE Xaba oyinsephe yomgijimi ophethe irekhodi laseNingizimu Afrika lika-10km kwabesifazane, uthi kwakuyisifiso sakhe seminyaka ukunqoba umjaho iSpar Women’s Grand Prix asethubeni lokuwunqoba okwesithathu nonyaka.
UXaba (30) weBoxer Athletics Club, uvivela ukuvikela isicoco sakhe ebangeni lika-10km kwiSpar Women’s Grand Prix ezogijinyelwa eKapa, ngeSonto.
Lo mjaho waseKapa ungowomlenze wokuqala wemijaho emihlanu yeSpar Grand Prix egijinyelwa emadolobheni amahlanu akuleli, okuyiKapa, iTheku, iPitoli, iGqeberha neGoli.
Nyakenye uXaba udle umhlanganiso kowamanqamu womlenze wokugcina weSpar Grand Prix, eGoli, waba yingqwele ngokunqoba kuyona yomihlanu imilenze yalo mjaho.
Ukuwunqoba okwesibili nyakenye, kubeke lo mgijimi odabuka eMbalenhle, eSecunda owadla lo mjaho okokuqala ngo-2018, ethubeni lokungena ohlwini lwabagijimi asebewuwine amahlandla amathathu, okunguRene Kalmer, Irvette van Zyl noTadu Nare wase-Ethiopia.
Ngenkathi enqoba lo mjaho nyakenye, ube ngumgijimi wokuqala waseNingizimu Afrika owuwine usuvuleleke kubagijimi bakwamanye amazwe okuqale ukwenzeka ngo-2019.
“Ukuwina iSpar Grand Prix kwakuyisifiso sami seminyaka. Ngakho ukuwina lo mjaho kabili kusho lukhulu kimina njengomgijimi osaphokophelele ukuzuza okuningi kulo mdlalo wokugijima.
Ukuza emjahweni wakulo nyaka njengozovikela isicoco kungifaka olukhulu ugqozi futhi ngikholwa wukuthi kukhuthaza nabanye abagijimi baseNingizimu Afrika ekwenzeni kahle kulo mjaho ngoba banalo ikhono,” kusho uXaba oqeqeshwa nguCaster Semenya.
Phakathi kwabagijimi okulindeleke ukuthi badlisele ogageni uXaba kulo mjaho, kubalwa uDiniya Abaraya wase-Ethiopia, Van Zyl, noCacisile Sosibo.
Imilenze elandelayo yeSpar Grand Prix, izoba seThekwini ngoJuni 22, ePitoli ngo-Agasti 2, eGqeberha ngoSepthemba 27, naseGoli ngo-Okthoba 5.
UXaba owuqale kahle unyaka ngokudla umhlanganiso ku-10 000m no-5000m kwi-Athletics Gauteng North Championships ekuqaleni kukaMashi, usahlalelwe ukuyovikela esinye isicoco sakhe kwi-Absa Run Your City, eGqeberha, ngo-Ephreli 13.