UPHINDE wakhala ngaphansi loyo owayengumengameli, uJacob Zuma, emzamweni wakhe wokushenxisa umshushisi omkhulu ecaleni lakhe lenkohlakalo, u-Advocate Billy Downer.
INkantolo eNkulu eMgungundlovu ichithe isicelo sesibili sikaZuma sokuba kushenxe uDowner ecaleni.
UZuma usola uDowner ngokuchema, ukhala ngokuthi waputshuzela izintatheli imininingwane yecala kanye nethinta impilo yakhe.
IJaji Nkosinathi Chili lithe uZuma wehlulekile ukuveza ukuthi amalungelo akhe azocindezeleka kanjani uma uDowner engashenxi ecaleni.
Isicelo sokuqala sachithwa iJaji Piet Koen, owagcina eshenxa kuleli cala.
Ummeli kaZuma, u-Advocate Dali Mpofu, uthe bazosiphonsela inselelo isinqumo sikaChili.
“Amaphepha okuphonsela inselelo isinqumo senkantolo sizowaletha singakapheli isikhathi esibekelwe sona.”
UDonwer uthe bafuna kuqale ngokushesha ukuqulwa kwecala.
“Sekuneminyaka kubambezeleka ukuqulwa kwecala. Kufanele kuqale ngokushesha ukuqulwa kwecala.”
Icala lizobuyela enkantolo ngenyanga ezayo.