UMHOLI we-MK oqavile usolwa ngokuqhuba umkhankaso wokugudluza esikhundleni owesifazane owanqaba ukuba baye ocansini.
Obewumdidiyeli we-MK eMpumalanga, uNkk Mary Phadi, usole umholi wenhlangano osePhalamende ngokuqhuba umkhankaso wokuba akhishwe esikhundleni ngenxa yokuthi wanqaba ukulala naye.
Lokhu ukusho encwadini ayibhekise emholini weqembu, uMnuz Jacob Zuma.
UNkk Phadi usanda kuxoshwa kwesokuba umdidiyeli we-MK eMpumalanga, kwase kufakwa u-Advocate Busisiwe Mkhwebane.
Le nhlangano yaphinde yamxosha uNkk Phadi ekuholeni iqembu esiShayamthetho saseMpumalanga.
Nokho uNkk Phadi wakuphonsela inselelo ukukhishwa kwakhe kulezi zikhundla, inkantolo yavumelana naye.
Nokho kunomdonsiswano ngokubuyela kwakhe ezikhundleni njengoba i-MK isiphonsela inselelo isinqumo senkantolo.
Encwadini ebonwe yiSolezwe, uNkk Phadi uthe izinkinga zakhe zaqala mhla enqaba ukuya ocansini nalo mholi.
UNkk Phadi uthe lo mholi wamcela ukuba bachithe ubusuku ehhotela emva komhlangano weqembu owawuseNelspruit, ngo-Agasti.
Uthe lo mholi wamthumelela umyalezo ebusuku ngo-10:54.
UNkk Phadi uthe akazange awuphendule lowo myalezo.
“Akuzange kwehle kahle kimi ukuthola lo myalezo. Njengomholi we-MK ngiyazi ukuthi kufanele sibeke phambili ubuqotho nokwethembeka. Ngakhetha ukungaphenduli ngoba nginqena ukuthi ngizosuke ngimphendule kabi.”
UNkk Phadi uthe emva kwalesi sigameko kwabe sekuqala imizamo yokumgudluza esikhundleni.
“Njengomuntu wesifazane ngibona ngihlaselwa ngenxa nje yokuthi nganqaba ukuchitha ubusuku naye. Ziningi izinto ezingelona iqiniso ezikhulunywa ngami. Sekuyangicacela manje ukuthi lo mkhankaso wokungcolisa igama lami uphekwa uyena.”
Imizamo yokuthola ukuphawula kukaNkk Phadi, kanye nokhulumela i-MK, uMnuz Nhlamulo Ndhlela, ayizange iphumelele.
Lukhulu uqhekeko ebuholini be-MK esifundazweni iMpumalanga.
Amalungu eqembu ahlukene phakathi njengoba amanye eseka uNkk Phadi, bese kuthi amanye angaku-Advocate Mkhwebane.
I-MK iyiqembu lesibili ngobukhulu eMpumalanga.