UPHELE kabi umjolo wesalukazi esineminyaka engu-68 sibulawa yisoka ngesitini.
Ngokombiko wamaphoyisa, umufi ubelele endlini yakhe eRamotshinyadi, eMopani District, eLimpopo, ngesikhathi kufika isoka lakhe ngabo-4 ekuseni ngeSonto.
Kuthiwa kuqale ingxabano phakathi kwalaba bobabili isoka labe selilanda isitini lashaya isalukazi saquleka.
“Kubizwe abezimo eziphuthumayo abafike kulo muzi bazama ukwelapha owesifazane. Abezimo eziphuthumayo bathole ukuthi isalukazi silimale kabi saphangalala sifika esibhedlela,” kusho uColonel Malesela Ledwaba, okhulumela amaphoyisa eLimpopo.
UCol Ledwaba uthe amaphoyisa akule ndawo aphume umkhankaso wokuthungatha umsolwa, ngenhlanhla watholakala.
Kulindeleke ukuba avele phambi kweMantshi yaseTzaneen lapho okuzoqinisekiswa khona imininingwane yakhe neminyaka yakhe uma esethweswa ngokusemthethweni icala lokubulala.